Túrkistanǵa kelin bolyp túsken Sýdjın Lıdiń ómiri kınoǵa aınaldy
TÚRKІSTAN. KAZINFORM — Búgin Túrkistan qalasynda jańa fılmniń tusaýy kesildi.
TURKISTAN telearnasy ótken jyly alǵashqy kınotýyndysyn túsirgen bolatyn. Komedııalyq melodrama janryndaǵy «Káris kelin» fılmi ómirdegi shynaıy oqıǵaǵa negizdelgen.
Fılmde Sáken esimdi túlkibastyq jigit pen ońtústikkoreıalyq Sýdjın Lı esimdi qyzdyń arasyndaǵy syrly sezimge toly hıkaıa baıandalady.
Koreıada 5 jyl jumys istegen Sáken 2023 jyly Sýdjın Lıdi qarashańyraǵyna kelin etip túsirgen.
Búginde jas otbasy tatý-tátti ómir súrip jatyr.
Kınoda Sýdjın Lıdiń Qazaqstanǵa kelgen alǵashqy kúnderde bastan keshken oqıǵalary sýretteledi.
Sondaı-aq, tyrnaqaldy týyndyda eki jastyń mahabbaty arqyly otbasy qundylyqtary, qazaqy dástúrler keńinen nasıhattalady.
Sonymen qatar, jańarǵan Túrkistan qalasy men Túrkistan oblysynyń tabıǵaty kórermenge jan jaqty kórsetiledi.
Fılm stsenarııin telearna qyzmetkerleri birlese jazyp shyqqan. Bul týyndy alǵashqyda teleserıal retinde túsirilgen.
Degenmen kórermen tarapynan suranys bolǵandyqtan tolyq formatty fılm óńdelip, kınoteatrdan da kórsetý josparlanyp otyr.
Basty rólderdi Shymkent qalasy men Túrkistan oblysynyń kásibı akterleri somdaıdy.
Fılm Túrkistan qalasy men Tólebı aýdanynda bar bolǵany 9 kúnde túsirilgen.
Aıta keteıik, buǵan deıin Koreıadan Túlkibasqa kelin bolyp túsken Sýdjın Lı baýyrsaq pisirip, et asýdy úırenip alǵanyn jazǵan bolatynbyz.
