Túrkistanǵa kelgen týrısterdiń kóbine nege kóńili tolmaıtyny belgili boldy
TÚRKІSTAN. KAZINFORM - Túrkistan oblysyna jyl basynan beri 15 myń sheteldik týrıst kelgen. Júrgizilgen saýalnamada jalpy kelýshilerdiń basym kópshiligi qyzmet sapasy men ájethanaǵa shaǵym jasaǵan. Bul týraly Túrkistan oblysy ákiminiń birinshi orynbasary Zulpyhar Joldasov oblys ákiminde ótken apparat májilisinde málimdedi.
Túrkistan oblysyna kelýge qyzyǵýshylyq tanytatyndar qatary kún sanap artyp keledi. Túrki áleminiń týrıstik astanasy atanǵan kıeli óńirde soǵan saı týrıstik jobalar qolǵa alynbaq. Búgin oblys ákimi Darhan Satybaldynyń tóraǵalyǵymen ótken apparat májilisinde osy jáne basqa da týrıstik qyzmetter talqylandy. Oblys basshysy bul salany qysqa ýaqytta jandandyrýdy, kemshiliktermen jumys isteýdi qatań tapsyrdy. Sonymen qatar aýdan, qala ákimderine kıeli nysandardyń tazalyǵyn saqtaýdy aıtyp, sol aýmaqtaǵy jol belgileri men jaryqtandyrý máselesin sheshýdi júktedi.
«Bizdiń oblysqa týrısterdi tartýdyń birden bir joly, olarǵa sapaly ári durys qyzmet kórsete alý dep oılaımyn. Bul bizdiń eń birinshi mindetimiz bolýy tıis. Budan bólek jańa jobalar qolǵa alynyp, jan-jaqty qyzyqtyrýymyz kerek. Maýsym aıynda Memleket basshysy týrızm máseleleri boıynsha jıyn ótkizip, birqatar tapsyrma bergen bolatyn. Qysqa merzimde týrıstik ónimder men týrıster sanyn arttyrý úshin Kúltóbe qalashyǵy men Qolónershiler qalasy jobasyn júzege asyryp, ekotýrızmdi damytý qajet. Sonymen qatar ulttyq qundylyqtarǵa negizdelgen sheberlik saǵattary, ulttyq oıyndar men taǵamdardy usynyńyzdar. Servıs deńgeıin jaqsartý maqsatynda týrıstik bıznes ókilderin oqytý jumystaryn turaqty júrgizińizder», – dedi Darhan Satybaldy.
Túrkistan oblysy ákiminiń birinshi orynbasary Zulpyhar Joldasovtyń aıtýynsha atalǵan salaǵa jan-jaqty taldaý júrgizilgen. Sonymen qatar otandyq týrızm mamandary men sarapshylardyń usynystary tyńdalyp, birqatar jobalar josparlanǵan. Jalpy kelýshilerdiń arasynda saýalnamada júrgizilgen. Qorytyndysynda qyzmet sapasy men ájethanaǵa degen shaǵym kóp túsken.
«Álemdik tendentsııany eskere otyryp, týrızmdi damytý barysynda ekologııalyq taza jobalar qoldanylady. Onyń biri – vızıt ortalyqtar. Elimizde bul jobanyń tıimdi keısteri bar. Oblysta osyndaı ortalyqtardy júzege asyrý usynylyp otyr», - dedi Zulpyhar Joldasov.
