Túrkistandyqtardy shet memleketterge jumysqa ornalastyratyn ortalyq ashyldy
TÚRKІSTAN. KAZINFORM - Endi Túrkistan óńiriniń turǵyndary Ulybrıtanııa, Qatar, Ońtústik Koreıa elderinde zańdy túrde jumysqa ornalasa alady.
Búgin óńirimizge arnaıy kelgen Ulybrıtanııanyń Qazaqstandaǵy Elshisi Ketı Lıch Túrkistan oblysynyń ákimi Darhan Satybaldymen kezdesken bolatyn. Sodan keıin BUU Kóshi-qon agenttiginiń Qazaqstandaǵy Mıssııasynyń basshysy, Ortalyq Azııa boıynsha úılestirýshisi Serhan Aktoprak jáne Túrkistan oblysy ákiminiń orynbasary Beısenbaı Tájibaevpen birge shetelderde jumysqa ornalastyrýdy oqytatyn «Aldyn ala daıarlyq ortalyǵynyń» saltanatty ashylýyna qatysty.
Ortalyq jumys izdeýshilerge maǵlumattar men keńester berý, til úıretý, qaýipsiz kóshi-qondy qamtamasyz etý, saparǵa daıyndaý, tájirıbe arttyrý, jalpy jan-jaqty qoldaý kórsetý maqsatynda quryldy.
Ókilder áýeli oblystyq «Eńbek mobıldiligi ortalyǵynyń» qyzmeti men jumysyn bastaǵan oqý ortalyǵy kabınetterimen tanysty. Shetelde jumys isteýge nıetti azamattarmen tildesti. Sondaı-aq «Ortalyq Azııadan Ulybrıtanııaǵa maýsymdyq jumysshylardyń qaýipsiz kóshi-qony» jobasy aıasynda «Shetelde jumys isteýge nıetti azamattardy aldyn ala daıarlaý ortalyǵy» taqyrybyndaǵy jıynda bastamanyń mańyzdylyǵy aıtyldy.
– QR Eńbek jáne halyqty áleýmettik qorǵaý mınıstrligi jáne Qazaqstandaǵy Halyqaralyq kóshi-qon uıymynyń bastamasymen, Túrkistan oblysy ákimdiginiń qoldaýymen memleketkaralyq ıgi jobalar júzege asyrylmaq. Pılottyq joba ázirge Qazaqstannyń 3 aımaǵynda qolǵa alynyp, oǵan halqy tyǵyz ornalasqan Túrkistan óńiri de enip otyr. Túrkistan óńirinde qazirgi tańda 2,2 mıllıonǵa jýyq halyq turady. Onyń 850 myńy eńbekke qabiletti. Alaıda 46%-y ózi-ózi jumyspen qamtyǵandar sanatyna kiredi. Sondyqtan biz úshin jumyssyzdyqty azaıtý mańyzdy baǵyt. El azamattary kóp jaǵdaıda til meńgermegennen, baratyn eldiń Zańdaryn bilmegendikten, alaıaq ári senimsiz kompanııalardyń áserinen túrli kedergiler men qatelikterge ushyraıtyny jasyryn emes. Bul bastama arqyly shetelden aldyn ala suranystardy jáne bos vakansııalar aldyn ala belgilenedi. Osy ortalyqtyń ashylýyna oraı alǵashqy toptardy oqytý bastaldy. Eńbekshi-mıgranttardyń quqyqtary men ál-aýqatyn qorǵaý, kóshi-qonnyń qaýipsiz ári senimdi júrgizilýi, qatysýshylardyń bilimin jetildirý, ózge de resýrstarmen qamtýdy úılestirý jumystary oblystyq «Eńbek mobıldiligi ortalyǵyna» mindettelip otyr. Árıne elshilikpen birlese atqarýǵa tıispiz. Óńir turǵyndary osyndaı múmkindikti paıdalanǵany abzal, – dedi Beısenbaı Dáýletuly.
Ketı Lıch arnaıy eńbek utqyrlyǵy ortalyǵynyń senim telefonyn iske qosý, mamandardy keshendi oqytý jáne qajetti jabdyqtarmen qamtý keregin jetkizdi. Statıstıkalyq derekterdi de ortaǵa saldy.
– Sońǵy jyldary bizdiń maýsymdyq jumyskerler baǵdarlamasy boıynsha Ulybrıtanııaǵa keletin qazaqstandyqtardyń sany aıtarlyqtaı ósti. 2019 jyly maýsymdyq jumyskerdiń vızasyn 4 adam alǵan bolsa, 2024 jyldyń І jartyjyldyǵynda 4400-den asqan. Biz úmitkerlerdiń Ulybrıtanııada ómir súrý men jumys isteýdiń oń tájirıbesi bar ekenine kóz jetkizýge basymdyq beremiz. Ol úshin osyndaı mamandandyrylǵan kóshpeli daıyndyq aqparattyq ortalyǵynyń ashylýyn quptaımyz, - dedi Ulybrıtanııanyń Qazaqstandaǵy Elshisi.
Al, Serhan Aktoprak kóshpeli daıyndyq jumyskerlerdiń jańa ortaǵa tezirek beıimdelýine yqpal jasaıtynyn atap ótti. Bul tájirıbe Qyrǵyzstan, Tájikstan, Túrikmenstan jáne Ózbekstan elderinde qoldanysqa ıe. Ortalyq Azııa elderiniń úzdiksiz ekonomıkalyq ilgerileýine, jumyssyzdyqty azaıtýǵa, seriktestikti nyǵaıtýǵa jáne dúnıejúzilik mıgratsııalyq qozǵalystarǵa septigi mol.
Sheteldik qonaqtar munan keıin QR Prezıdenti janyndaǵy memlekettik basqarý Akademııasynyń Túrkistan oblysy boıynsha fılıalynda trenerlerdi daıarlaý dárisiniń alǵashqy sessııasyna kýá boldy. Respýblıkanyń ár óńirinen jınalǵan qatysýshylarmen erkin pikir almasyp, suhbattasty.
