Túrkistandyqtardy aldap, 7 mln teńgeden asa shyǵyn keltirgen alaıaq ustaldy
TÚRKІSTAN. KAZINFORM — Kúdiktiniń buǵan deıin úsh ınternet-alaıaqtyq deregine qatysy bary anyqtaldy.
Túrkistan oblysy polıtsııa departamenti kıberqylmysqa qarsy is-qımyl basqarmasynyń qyzmetkerleri iri kólemdegi ınternet-alaıaqtyq qylmysyna kúdikti azamatty qolǵa túsirdi.
Polıtsııa málimetinshe, kúdikti ózin bank qyzmetkeri retinde tanystyryp, áleýmettik jeli arqyly Túrkistan qalasynyń turǵynyn tómen paıyzben nesıe rásimdeýge bolatynyna sendirgen. Keıin senimge kirip, túrli syltaýmen jábirlenýshiden 2,5 mıllıon teńgeden astam qarajat alǵan.
Jedel-izdestirý is-sharalary barysynda tártip saqshylary kúdiktiniń jeke basyn anyqtap, Shymkent qalasynyń turǵynyn ustady.
— Qazir ol ýaqytsha ustaý ızolıatoryna qamaldy. Sotqa deıingi tergeý amaldary júrgizilip jatyr. Tergeý barysynda kúdiktiniń osyǵan uqsas taǵy úsh ınternet-alaıaqtyq deregine qatysy bary anyqtaldy. Jalpy shyǵyn kólemi 7 mıllıon teńgeden asady, — delingen oblystyq polıtsııa departamenti taratqan aqparatta.
Polıtsııa azamattardy áleýmettik jelilerdegi kúmándi habarlandyrýlarǵa senbeýge, sondaı-aq belgisiz adamdarǵa jeke derekterin bermeýge jáne aqsha aýdarmaýǵa shaqyrdy.
Buǵan deıin Qazaqstanda ınternet-alaıaqtyqtan kelgen shyǵyn 20 mlrd teńgege jetkeni týraly jazǵan edik.
