Túrkistandyqtar jylýǵa 12,8 mln teńge artyq tólegen

TÚRKІSTAN. KAZINFORM – «Sybaılas jemqorlyqqa qarsy volonterlik» jobasynyń túrkistandyq eriktileri jylý júıesine monıtorıng júrgizdi. Nátıjesinde 32 kópqabatty turǵyn úıdiń 2265 turǵyny jylýǵa 12,8 mln teńge artyq tólegeni anyqtaldy. 

Qaladaǵy kópqabatty turǵyn úılerde esepteý qurylǵylary ornatylǵan. Soǵan qaramastan, turǵyndarǵa jylý energııasynyń qunyn sharshy metrmen qymbat esepteý derekteri belgili boldy.

Sybaılas jemqorlyqqa qarsy qyzmettiń usynýymen júrgizilgen jumystar nátıjesinde jylý energııasy úshin qurylǵynyń esebine sáıkes tólemaqylar qaıta esepteldi.

«Jylýǵa baılanysty ózekti máseleler áleýmettik mańyzy bar problemalardy sheshý úshin ázirlengen óńirlik sybaılas jemqorlyq táýekelder kartasyna engizilgen. «Sybaılas jemqorolyqqa qarsy volonetrlik» jobasy aıasynda eriktiler qoǵamdyq baqylaý, sybaılas jemqorlyqqa qarsy zertteýler jáne bilim berý, pro bono (kásibı kómek kórsetý) jáne korporatıvtik eriktilik baǵyttary boıynsha ortaq iske úles qosyp keledi» - delingen Túrkistan oblysy boıynsha Sybaılas jemqorlyqqa qarsy qyzmet aqparatynda.

Aıta keteıik, buǵan deıin Túrkistan oblysynda kommýnaldyq qyzmetter baǵasy zańsyz kóterilgenin jazǵan bolatynbyz.