Túrkistandyqtar qaı salanyń qyzmetine jıi shaǵymdanady

TÚRKІSTAN. KAZINFORM – Óńir turǵyndaryn jaryq pen aýyz sý jáne qoqys máselesin alańdatady

Túrkistan oblysynyń árbir aımaǵynda turǵyndardy alańdatqan máseleler kóp. Mysaly, Tólebı aýdanyndaǵy Zaǵambar, Kóksáıek, Zertas aýyldary men Leńgir qalasynyń turǵyndary 109 biryńǵaı baılanys telefonyna 83 ret habarlasyp, aýyz sý qubyrynyń jarylǵandyǵyn aıtqan. Sondaı-aq, ıesiz ıetterdiń kóshe kezip júrýi boıynsha 122 ret habarlama qaldyrǵan. Saýran aýdany, Shornaq aýylyndaǵy Temirbaev kóshesiniń turǵyndary joldyń joqtyǵynan laı keship júrýge májbúr. Bul boıynsha 18 ret ótinim berilgen. Al, Túrkistan qalasynda jer qazyp, káriz jumystaryn jóndegen mamandar, jumys ornyn qalpyna keltirmeı ketip qalǵan. Shaýǵar, Bekzat, Otyrar móltekaýdandarynda osy is qaıtalanǵan. Atalǵan jaǵdaı boıynsha 210 habarlama tirkelgen.

Jalpy ortalyqtaǵy habarlamalardy saralaıtyn bolsaq, eń kóp ótinish Túrkistan, Kentaý qalasy men Tólebı, Báıdibek, Saıram aýdandarynan túsetindigin kóremiz. Al, negizgi máselelerdi elektr jaryǵymen jabdyqtaý, aýyz sý, veterınarııalyq qyzmet, kóshe jaryqshamdary, turmystyq qaldyqtar quraıdy.

Oblystyq tsıfrlandyrý, memlekettik qyzmetter kórsetý jáne arhıvter basqarmasynyń basshysy Marat Aınabekovtiń aıtýynsha, ortalyqqa túsken ótinimderdiń 96 paıyzy qońyraý shalý arqyly jáne 4 paıyzy áleýmettik jeliler arqyly qabyldanǵan. Bıylǵy jyl basynan beri 11 358 qońyraý túsken. Al, qańtar aıy boıynsha túsken ótinim 15 paıyzǵa artqan.

- Ótken jyly 130 224 qońyraý túsip, 126 887 ótinim der kezinde, 3337 ótinim merzimi ótip jabyldy. Qazirgi tańda ortalyqtyń qyzmetin nasıhattaý boıynsha jumys qarqyndy istelip jatyr. Atap aıtqanda oblys aýmaǵynda ornalasqan aýdan-qalalardyń barlyǵynda ınfobannerler ornalastyrylyp, áleýmettik jelilerde 109-dyń qyzmeti jaıly posttar kúndelikti jaryqqa shyǵyp jatyr, - dedi Marat Aınabekov.

Taǵy bir aıta keterligi, 109 jelisiniń jumysyna jasandy ıntellekt múmkindikterin qoldaný josparlanyp otyr. Bul óz kezeginde ótinishterdiń sapaly oryndalýyn arttyrady jáne máselelerdiń tez ári tıimdi sheshilýine yqpal etpek.

Aıta keteıik, budan buryn Túrkistanda zańsyz salynǵan 14 ǵımarat sot sheshimimen buzylǵandyǵyn jazǵan bolatynbyz.