Túrkistandyqtar amfıteatrǵa jınalyp, Sáken Bıbosynovqa qoldaý kórsetti
TÚRKІSTAN. KAZINFORM - Túrkistandyq jankúıerler Parıjde ótken boksty qala ortalyǵyndaǵy amfıteatrdan tamashalady.
Túrkistan qalasynyń sportsúıer qaýymy oblystyq Jastar ortalyǵy ornalasqan amfıteatrǵa jınaldy. Úlken plazmaly ekran arqyly boks básekesin tamashalaǵan jankúıerler jerlesteri Sáken Bıbosynovqa qoldaý kórsetti.
«Qazaqstan, Qazaqstan» dep urandatqan kópshilik Sákenniń árbir soqqy jasaǵan sátinde qol soǵyp, qoshemet kórsetti. «Sáken biz saǵan senemiz», «Sáken biz senimen birgemiz» degen uran sózdi jazbalar men Memlekettik Týdy kóterip, qoldaıtyndyqtaryn jetkizdi.
«Túrkistandyqtardyń Sáken baýyrymyzdy qoldaýy óte keremet. Qoldan kelgenshe barsha sportshylarymyzǵa qoldaý kórsetemiz. Biz birgemiz», - dedi qoǵam belsendisi Oljas Mamyr.
Boks básekesin kórýge jergilikti ákimdik qyzmetkerlerimen qatar ardager sportshylar men jastar kóp jınaldy.
Sharshy alańda Sáken Bıbosynov jeńiske jetken sátte barshasy qol alysyp, birin biri quttyqtady.
Aıta keteıik, Frantsııa astanasy Parıj qalasynda ótip jatqan Olımpıada oıyndarynda qazaqstandyq boksshy Sáken Bıbosynov alǵashqy jekpe-jeginde jeńiske jetti.
