Túrkistandyq jastar Ońtústik Koreıada vızasyz jumys isteýge múmkindik almaq
TÚRKІSTAN. KAZINFORM — Túrkistan oblysynda ashylatyn ońtústikkoreıalyq ýnıversıtettiń fılıalyn bitirgen stýdentter atalmysh elde vızasyz jumys isteýge múmkindik alady. Bul týraly Ǵylym jáne joǵary bilim mınıstri Saıasat Nurbek BAQ onlaın baspasóz máslıhatynda aıtty.
Mınıstr aldaǵy 1-2 jyldyń kóleminde el aýmaǵynda álemdegi jetekshi tehnıkalyq ýnıversıtetterdiń 5 birdeı kampýsy ashylatynyn aıtty.
Sonyń biri qazaqstandyq jastarǵa Ońtústik Koreıada vızasyz jumys isteýge múmkindik bermek.
«Tórtinshi kampýs Túrkistan qalasynda oryn tebedi. Ońtústik Koreıada WOSONG deıtin jekemenshik ýnıversıtet bar. Oblystyń ákimimen birge ol ýnıversıtetke arnaıy baryp, kezdeskenbiz. Sol ýnıversıtettiń kampýsyn salý úshin ǵımarat pen 1,2 gektar jer berip jatyrmyz», — dedi ol.
Vedomstvo basshysynyń sózinshe, qazir Ońtústik Koreıada halyq «qartaıyp» bara jatyr. Jyl saıyn 150 myń jumys kúshin syrttan aldyrýǵa májbúr.
«Biz ol ýnıversıtetke qurylysy bitpegen ǵımaratty aqysyz negizde beremiz. Olar sol qurylysty óz jobasy boıynsha aıaqtaıdy. Keıin osy WOSONG-Túrkistan ýnıversıtetiniń túlekteri Ońtústik Koreıada vızasyz jumys isteı alady. Oqý kelesi jyly bastalady. Kıberqaýipsizdik, kompıýterlik ınjenerııa jáne Data Science baǵyttarynda maman daıyndap bastaıdy», — dedi Saıasat Nurbek.
