Túrkistandyq ustaz álem tilderindegi 100-den asa óleńdi qazaq tiline aýdarǵan
TÚRKІSTAN. KAZINFORM - Keles aýdanyndaǵy T.Begmanova atyndaǵy jalpy bilim beretin mektebiniń ózbek tili men ádebıeti pániniń muǵalimi Robııa Dýstanova álem tilderindegi 111 óleńdi qazaq tiline aýdarma jasaǵan. Sondaı-aq, qazaq klassık aqyndarynan jáne qazirgi qazaq poezııasynan 135 óleńdi ózbek tiline tárjima jasapty.
Daryndy muǵalim Qazaqstanǵa 2000 jyldardyń basynda kóship kelgen. Qazirgi tańda atalǵan bilim ordasynda jas órenderdi tárbıelep, balalarǵa bilim berip keledi.
«Jas kezimnen aqyndyq ónerge qatty qyzyqtym. Búgingi kúni balalarǵa ózbek tili men ádebıetinen sabaq beremin. Sonymen qatar sabaq barysynda álem aqyndarynyń ómiri men shyǵarmashylyǵyn zertteımiz. Qazaq tilinen ózbek tiline Muqaǵalı Maqataevtyń shyǵarmalarynan 50 óleń, basqa qazaq klassık aqyndarynan 41 óleń, zamanaýı qazaq poezııasynan 44 óleń, jalpy 135 óleń aýdardym. Áli de shyǵarmashylyq izdenistemin», - dedi ustaz.
Sondaı-aq, ózbek tilinen qazaqshaǵa 96 óleń, qaraqalpaq tilinen 1 óleń, orys poezııasynan 6 óleń, qumyq tilinen 5 óleń, túrik jáne ázirbaıjan tilinen 2 óleń aýdarǵan. Ózi de arasynda óleń jazyp turady. Búginde ustazdyń jazbalary men aýdarmalary Túrkııa men Ózbekstanda basylǵan jınaqtarǵa da engen.
Budan bólek, ulaǵatty ustaz oblystyq, respýblıkalyq, halyqaralyq baıqaýlar men forýmdarǵa qatysyp turady.
Aıta keteıik, Keles aýdanynyń bilim bólimine qarasty 63 bilim oshaǵy bolsa, onda 4007 pedagog oqýshylarǵa bilim berýde. Sonyń ishinde pedagog-moderator sanatyndaǵy muǵalimderdiń sany 864-ti quraıdy. Sonymen qatar 1 144 pedagog-sarapshy bolsa, 762 muǵalim pedagog-zertteýshi bolyp qyzmet atqarady. Sheber pedagogterdiń sany 32-ni qurap otyr. Sondaı-aq, 1257 kishi qyzmetker bilim salasynda eńbek etedi.
