Túrkistandyq túlek álemniń 80-nen astam jetekshi ýnıversıtetinen shaqyrtý aldy
TÚRKІSTAN. KAZINFORM – Túrkistan oblysynyń Maqtaaral aýdanyndaǵy Q.Amanjolov atyndaǵy №22 jalpy bilim beretin mektebiniń túlegi Medına Bektursynqyzy AQSh, Kanada, Ulybrıtanııa, Túrkııa, Birikken Arab Ámirlikteri jáne Eýropanyń jetekshi joǵary oqý oryndarynan 80-nen astam usynys alyp, óz biliminiń básekege qabiletti ekenin dáleldedi.
Oqý-aǵartý mınıstrligi málimetinshe, bedeldi halyqaralyq ýnıversıtetter talapkerdiń akademııalyq jetistikterin, kóshbasshylyq qabiletteri men qoǵamdyq belsendiligin joǵary baǵalap, oqý jáne granttyq múmkindikter usynǵan. Nuráli Medına halyqaralyq IELTS jáne SAT emtıhandaryn sátti tapsyryp, álemniń jetekshi joǵary oqý oryndaryna túsýge qajetti akademııalyq daıyndyq deńgeıin kórsetti.
Mektep qabyrǵasynda ol úzdik oqýshylardyń qatarynan kórinip, ǵylymı, zııatkerlik jáne qoǵamdyq jobalarǵa belsendi qatysty. Aǵylshyn tili páninen «Jasandy ıntellekt – ǵylymı zertteýdiń jańa múmkindikteri» taqyrybyndaǵy respýblıkalyq ǵylymı-shyǵarmashylyq konferentsııada І oryn ıelenip, respýblıkalyq «Oı zerek» olımpıadasynyń jeńimpazy atandy.
Qazir Nuráli Medına ózine usynylǵan kóptegen múmkindiktiń ishinen Ońtústik Koreıadaǵy Inha University ýnıversıtetin tańdaýǵa nıet bildirip otyr. Ol sapaly halyqaralyq bilim alyp, bolashaqta jınaǵan tájirıbesi men bilimin el ıgiligine jumsaýdy maqsat etedi.
Aıta keteıik, mektep bitirýshilerdiń bilim jarysynda eń joǵary upaı – 140 ball enshilegen talapkerler elimiz boıynsha sanaýly ǵana. Sonyń biri Qyzylorda oblysynyń Shıeli aýdanynda ornalasqan Shoqan Ýálıhanov atyndaǵy №127 orta mektep-lıtseıdiń túlegi Káýsar Altynsary týraly jazǵan edik.
