Túrkistandyq tolaǵaı tas kóterip, shóp tasyp kúsh jınaıdy
TÚRKІSTAN. KAZINFORM – Alyptar saıysyna qatysqan aýyldyń jigiti 100 kelilik alyp tasty 150 metrge kóterip barǵan.
Saryaǵash aýdanynyń Jylǵa aýylynda turatyn Baǵlan Myrzataıdy jerlesteri «tolaıǵaı» dep atap, erekshe qurmetteıdi. Onyń boıyndaǵy alyp kúsh, tózimdilik pen qaısarlyq kópshilikti tańǵaldyrmaı qoımaıdy. Baǵlan tek aýylda ǵana emes, óńirlik jáne halyqaralyq jarystarda da óz qabiletin dáleldep, talaı márte júldeli oryndarǵa ıe bolǵan.
Baǵlannyń sportqa degen qyzyǵýshylyǵy bala kúninen bastalǵan.
– Bala kezimde dzıýdoǵa qyzyǵyp, bes jyl boıy sportty ómirimniń bir bólshegi ettim. Respýblıkalyq birinshilikterde júldeli oryndar alǵan kezderim az emes. Degenmen kúndelikti tirshilikpen aınalysyp, ýaqytsha sporttan qol úzip qaldym. Qazir aýylda turamyn. Negizgi jumysym joq, biraq qara jumys arqyly kúsh jınaımyn. Shóp oryp, tas kóterip, aýylda tabylǵan jumysty istep kete beremin – deıdi ol.
Baǵlannyń kúsh-qýaty men tózimdiligi ár jarysta baıqalady. Jaqynda Túrkistan oblysynda ótken tolaǵaılar saıysynda birinshi oryndy jeńip, aýyldyq sporttaǵy bedelin taǵy da arttyrdy. Ótken jyly Astana qalasynda ótken respýblıkalyq birinshilikte úshinshi oryndy qanjyǵasyna baılaǵan edi. Tipti, Tashkenttegi álemdik jarystan da qur qol qaıtpaǵan ol, sol jarystan da úshinshi orynnan kórindi.
Onyń bul jetistikteri beker emes. 100 kelilik alyp tasty 150 metrge kóterip barý, 160 kelilik bóreneni ıyqqa salyp 10 márte otyryp-turý, 10 kelilik naızany 10 metrge laqtyrý, 500 kelilik júgi bar arbany 12 metrge súırep shyǵý – munyń barlyǵy Baǵlan úshin kúndelikti ómirdiń bir bóligi. Jarystyń talabyna sáıkes 100 kelilik ógizdiń mýlıajyn jeti ret kóterý de onyń qarapaıym isi bolyp sanalady.
– Jarys aldynda tek úsh kún júgirip daıyndalamyn. Úlken traktordyń balonyn ary-beri súırep, denemdi qyzdyramyn. Negizgi kúshimdi aýyldaǵy qara jumysqa arnaımyn. Tas kóterip, shóp shaýyp júremin. Sondyqtan arnaıy daıyndyq rejımim joq – deıdi ol.
Baǵlannyń boıy – 1,85 sm, salmaǵy – 98 keli. Ol jaqynda Almaty oblysynda ótetin «Aqbıdaı» dala jarystaryna qatysýdy josparlap otyr. Bul jarys aýyldyq sport túrlerinen ótetin erekshe saıys, onyń ishinde tolaǵaılyq saıys ta bar.
Baǵlan Naýryz merekesindegi qoshqar kóterý men ógiz kóterý jarystaryna da belsendi qatysady. Ol birneshe márte jeńis tuǵyryna kóterilip, aýyl halqynyń qurmetine bólengen.
– Leńgirde 150 kelilik ógizdi 12 ret kóterip, otyryp-turdym. Al 45 kelilik qoshqardy 200 ret kótergen kezim bar. Endigi maqsatym – álemdik jarysta birinshi oryn alý – deıdi ol.
Baǵlan otbasy úshin de úlgili áke. Ol jubaıymen birge bir qyz ben eki ul tárbıelep otyr. Balalary ákesiniń kúsh-jigerin kórip, ár isin maqtan tutady.
– Tas kótergen adam bolsa boldy, áke dep aıqaılaıdy. Balalarym meniń eń úlken qoldaýshym – deıdi ol.
Baǵlan Myrzataı – tek óz aýylynda ǵana emes, óńirde de, tipti halyqaralyq arenalarda da kúsh-qýatymen, qaısar minezimen, adaldyǵy men qarapaıymdylyǵymen tanylyp keledi. Onyń tózimdiligi, eńbekqorlyǵy, tabandylyǵy – jastarǵa úlgi, árbir aýylǵa maqtanysh.
Aýylda qara jumys istep, kúndelikti tirshilikten kúsh jınaǵan Baǵlan ár jarysqa tek fızıkalyq daıyndyqpen ǵana emes, rýhanı daıyndyqpen de qatysady. Qolyna kelgen tas, bórene, naıza – onyń úshin synaq emes, ómir mektebiniń bir bóligi. Kórermender onyń jarystaǵy ár áreketin tynysyn toryǵa otyryp tamashalaıdy, al Baǵlan úshin bul – óz qabiletin shyńdaý, óz aýylyna, óz eline degen súıispenshiligin kórsetý.
Osyǵan deıin Túrkistan oblysynyń turǵyny óziniń týý deregin 30 jyldan keıin dáleldegeni týraly jazdyq.