Túrkistandyq sharýalar maqta baǵasynyń tómendigine narazy
TÚRKІSTAN. KAZINFORM – Túrkistan oblysynda dıqandar maqtanyń qazirgi satyp alý quny shyǵyndaryn aqtamaıtynyn aıtyp, baǵany kóterýdi talap etti.
Búginde Túrkistan oblysynda 24 maqta óńdeý zaýyty men 169 maqta qabyldaý beketi jumys isteıdi. Oblystyq aýyl sharýashylyǵy basqarmasynyń málimetinshe, bıyl óńirde 173,6 myń gektar alqaptan 555 myń tonna shıtti maqta jınaý josparlanǵan.
Maqtaaral aýdanynda dıqandardyń ónimniń satyp alý baǵasyna qatysty shaǵymy áleýmettik jelilerde jarııalandy. Sharýalardyń aıtýynsha, maýsym boıǵy eńbegine qaramastan, maqtanyń qazirgi baǵasy shyǵyndaryn óteýge jetkiliksiz. Olardyń sózinshe, ónim naryqta tómen baǵalanyp otyr.
– Bıyl maqtanyń kelisin 200-220 teńgeden ótkizip jatyrmyz. Bul shyǵynymyzdy aqtamaıdy. Baǵa keminde 300 teńge bolsa deımiz. Bul másele keshe nemese búgin týyndaǵan joq, jyldar boıy kóterilip keledi, – deıdi sharýalar.
Maqta óndirýshiler keıbir qabyldaý beketterinde zerthananyń joqtyǵyn da másele retinde kóterdi. Olar ónim sapasyn anyqtaý kezinde ashyqtyq qamtamasyz etilip, qabyldaý oryndaryndaǵy tarazylardyń durystyǵyn tekserýdi suraıdy.
Máselege qatysty Maqtaaral aýdanynyń ákimdigi túsinik berdi.
Vedomstvo málimetinshe, aýdanda 63 maqta qabyldaý beketi bar. Onyń 44-i jergilikti 7 maqta óńdeý zaýytyna, 19-y Jetisaı aýdanyndaǵy zaýyttarǵa tıesili.
Sharýalar kótergen máselelerdi talqylaý maqsatynda 30 qyrkúıekte Jetisaı aýdany ákimdiginiń apparatynda kóshpeli jıyn ótti. Jıynǵa oblysta qurylǵan mobıldi toptyń basshysy, oblys ákiminiń orynbasary Nurbol Turashbekov tóraǵalyq etti. Kezdesýge Maqtaaral, Jetisaı, Shardara, Saýran jáne Ordabasy aýdandary ákimdikteriniń ókilderi, quqyq qorǵaý organdarynyń qyzmetkerleri men maqta óńdeý zaýyttarynyń basshylary qatysty.
– Kelissózder nátıjesinde sharýalardyń talaby eskerilip, 1 keli maqtanyń baǵasy 230 teńge bolyp bekitildi. Naryq konıýnktýrasyna qaraı bul baǵa áli de ósýi múmkin. Sonymen qatar tarazy men zerthana jumystaryna qatysty zańbuzýshylyq nemese kelispeýshilik týyndaǵan jaǵdaıda sharýalardyń tıisti quzyrly mekemelerge júginip, máseleni jedel qaraýyna múmkindik jasaldy, – dep habarlady Maqtaaral aýdanynyń ákimdigi.
Qazir sharýalar alǵashqy maqta terimin jınap jatyr. Olar kún kúrt sýymaı turyp, ekinshi terimdi de ysyrapsyz ári sapaly aıaqtaýdy kózdeıdi.
Buǵan deıin túrkistandyq sharýalardyń maqta baǵasyna qatysty narazylyq bildirgenin habarlaǵan edik.
