Túrkistandyq sharýalar maqta baǵasyna qatysty narazylyq bildirdi
TÚRKІSTAN. KAZINFORM – Túrkistan oblysynda jyldar boıy qordalanǵan ózekti máseleler sheshimin tabý úshin oblys sharýalary men quzyrly mekeme ókilderi bas qosty.
Jıynda sharýalar maqta zaýyttaryndaǵy bıylǵy baǵany sóz etti. Ár zaýytta túrli baǵa belgilengenin aıtyp, bul máseleni bir júıege túsirý kerektigin jetkizdi. Kelesi jyly zaýyttar tarapynan usynylatyn kelisimshartta maqta baǵasy kórsetilse, ózderine tıimdi shartty tańdaý sharýalarǵa da qolaıly bolatyn edi degen usynys aıtyldy.
– Bul másele keshe nemese búgin týyndaǵan joq. Jyldar boıy aıtylyp keledi. Sizderden ótinerimiz, zaýyttar arasynda aldyn ala ózara sóz baılasý bolmaı, ádil básekelestik ornap, sharýalar da óz ónimin laıyqty deńgeıde ótkizýge múmkindik alsa deımiz. Osyǵan nazar aýdaryp, zańdylyǵyn qamtamasyz etýlerińizdi suraımyz, – dedi sharýalar.
Basqosýda oblys prokýrorynyń orynbasary Dáýlet Tlemısov dıhandardyń talap-tilegin tyńdap, zań talaptarynyń saqtalýyna monıtorıng júrgiziletinin, nátıjesine qaraı tıisti sharalar qabyldanatynyn atap ótti.
Al oblys ákiminiń orynbasary Nurbol Turashbekov ókiletti organ ókilderine kásipkerlerdiń quqyǵymen qatar sharýalardyń quqyǵy da zańmen qorǵalatynyn eskertip, kóterilgen máselelerdiń zańdylyǵyn saralaý barysynda eki tarapqa ońtaıly ortaq kelisim qajettigin alǵa tartty.
– Másele ashyq aıtylsa, asqynbaıdy. Desek te, barlyǵy zań aıasynda, tártippen sheshilýi tıis. Osy maqsatta búgingi kezdesýge zań ókilderin arnaıy shaqyrdyq. Kelesi jyly keleńsizdikterge jol bermeý úshin búgingi talqylaý mańyzdy. Zań men tártip barshamyzǵa ortaq, – dedi ol.
Jıynda belgili bolǵandaı, bıyl Túrkistan oblysynda maqta óńdeıtin 26 kásiporyn 178 beket arqyly 428 myń tonna ónim qabyldaǵan. Maqta baǵasy ónim sapasyna qaraı 250-270 tg aralyǵynda saqtalǵan.
Búginde respýblıka boıynsha óndirilgen maqtanyń 100% oblystyń enshisinde. Óńirde maqta shıkizatyna eksporttyq táýeldilikti joıý baǵytynda 5 maqta-toqyma klasterin qurý jumystary júrgizilip jatyr.
Budan buryn Túrkistan oblysynda shıtti maqtany ósirý jáne tereń óńdeý boıynsha ınvestıtsııalar týraly kelisim jasaý maquldanǵanyn jazǵan edik.