Túrkistandyq polıtseıler asyraýshysynan aırylǵan kópbalaly otbasyna syılyqtar tartý etti
Túrkistandyq polıtseıler asyraýshysynan aırylǵan kópbalaly otbasyna jańa jyldyq syılyqtar tartý etti, dep habarlaıdy Kazinform.
Áleýmettik jelide kómekke muqtaj jalǵyzbasty kópbalaly ana týraly vıdeo taraǵan bolatyn. Onda kishkentaı úıdi panalap otyrǵan otbasynyń múshkil háli baıandalǵan. Úıinde azyq-túliktiń joqtyǵy jáne ul-qyzdarynyń kıimge muqtaj ekendigi kórsetilgen. Tipti, sýyq úıdegi 5 adam bir kórpe jamylyp jatqany baıandalady.
Jańa jyl merekesiniń qarsańynda Jetisaı aýdandyq polıtsııa bóliminiń qyzmetkerleri men ardagerleri 4 perzentti jalǵyz ózi asyrap otyrǵan Álııa Áljanovanyń úıine arnaıy baryp, syılyqtar tabys etti. Onda kórpe, jastyq, azyq-túlik pen balalarǵa arnalǵan táttiler bar. Sondaı-aq, ydys-aıaq pen úlken teledıdar jáne bir qoı syılady.
Jalǵyzbasty ana da tártip saqshylarynyń izgi amaldaryna rızashylyǵyn bildirip, alǵys aıtty.
