Túrkistandyq polıtseıler otqa oranǵan úıden anasy men balalaryn aman alyp shyqty
Túrkistandyq polıtseıler bir otbasyn ólimnen qutqaryp qaldy, dep habarlaıdy Kazinform.
Oqıǵa Túrkistan qalasynda bolǵan. Qala kóshelerin patrýldep júrgen polıtsııa ınspektorlary Baǵlan Júnisov pen Jumaǵalı Alıakbarov tańǵy saǵat 06:00 shamasynda jeke turǵyn úıden órt shyǵyp jatqanyn kórgen.
Birden órt sóndirýshilerdi shaqyryp, ózderi de kómekke umtylǵan.
Turǵyn úıdiń syrtqy esikteri qulyptaýly bolǵandyqtan tártip saqshylary úıdiń aýlasyna asyp túsipti.
Kók tútin basqan bólme ishinen bir kelinshek pen eki búldirshindi qaýipsiz jerge alyp shyqqan.
Sol sátte oqıǵa ornyna jetken órt sóndirý qyzmetiniń mamandary jalyndy sóndirýge kirisken.
«Jedel járdem qyzmetkerleri órtten zardap shekken áıel men onyń ul-qyzyn tekserip, alǵashqy kómek kórsetti. Tilsiz jaý elektr symdarynyń tuıyqtalýynan tutanǵan. Búginde tıisti mamandar tekserý sharalary júrgizip jatyr. Óz kezeginde jergilikti turǵyn qyraǵylyq tanytyp, der kezinde kómek kórsetken polıtseılerge shynaıy alǵysyn bildirdi», - deıdi polıtsııa aǵa leıtenanty Baǵlan Júnisov.
