Túrkistandyq polıtseıler adam óltirmek boldy degen kúdikpen er adamdy ustady
TÚRKІSTAN. KAZINFORM- Jergilikti turǵynǵa tanysyn óltirmek boldy dep aıyp taǵylǵan bolatyn. Qazir kúdikti qamaýǵa alyndy.
Túrkistan oblysy polıtsııa departamentiniń baspasóz qyzmeti usynǵan aqparatqa súıensek, jedel-izdestirý is-sharalaryn júrgizgen krımınaldyq polıtsııa qyzmetkerleri kisi óltirýge oqtalǵan kúdiktini ustaǵan.
«Er adam bul áreketin moıyndady. Atalǵan fakti boıynsha qylmystyq is qozǵaldy jáne qajetti tergeý is-sharalary júrgizilýde. Kúdikti qamaýǵa alyndy. Qazirgi ýaqytta oqıǵanyń tolyq mán-jaıy anyqtalýda. Tergeý múddesine saı ózge aqparattar jarııa etýge jatpaıdy» - delingen vedomstva aqparatynda.
Aıta keteıik, budan buryn jábirlenýshiniń 19 jerinen pyshaq suǵyp, qashyp ketken túrkistandyq turǵyn izdestirilip jatqanyn jazǵan bolatynbyz. Kúdiktini izdeýge Túrkistan polıtsııasynyń jeke quramy tolyǵymen jumyldyryldy.
