Túrkistandyq polıtseı turǵyndy 5 mln teńgesinen aıyrylyp qalýdan saqtap qaldy
TÚRKІSTAN. KAZINFORM – Túrkistan oblysynyń Maqtaaral aýdanynda polıtsııa qyzmetkeri alaıaqtardyń arbaýyna túsken 59 jastaǵy áıeldi der kezinde toqtatyp, 5 mln teńgesin saqtap qalýǵa kómektesti, dep habarlaıdy Polisia.kz.
Oqıǵa polıtsııa qyzmetkeri Sherhan Qaltursyn jumystan tys ýaqytta júrgen kezde bolǵan.
Ol bank termınalynyń aldynda kúmándi qarjylyq operatsııa jasap jatqan áıeldi baıqap, mán-jaıdy anyqtaýǵa kirisken.
Belgili bolǵandaı, alaıaqtar áıelge telefon soǵyp, týystaryna poshta arqyly syılyq kelgenin aıtqan. Keıin senimine kirip, telefonyna jiberilgen rastaý kodyn surap alǵan.
Osydan keıin qaskóıler áıeldiń atyna 5 mln teńge nesıe rásimdep, aqshany óz shottaryna aýdartýǵa áreket jasaǵan.
Alaıaqtardyń sózine sengen áıel olardyń nusqaýyn oryndaý úshin bankke barǵan.
Alaıda jaǵdaıdyń mán-jaıyn túsingen polıtsııa qyzmetkeri onyń alaıaqtarǵa aldanyp turǵanyn aıtyp, aqsha aýdarý operatsııasyn toqtatýǵa kómektesken.
Osylaısha 5 mln teńge alaıaqtardyń qolyna túspeı, áıel iri qarjylyq shyǵynnan aman qalǵan.
Polıtsııa qyzmetkeriniń qyzmetten tys ýaqytta kórsetken qyraǵylyǵy alaıaqtyq árekettiń aldyn alýǵa múmkindik berdi.
Aıta keteıik, buǵan deıin Óskemende qala turǵyny alaıaqtarǵa aqsha aýdarmaq bolǵan 79 jastaǵy ájeni toqtatyp, onyń 3 mln teńgeden astam qarajatyn saqtap qalǵany habarlanǵan.
