Túrkistandyq «Órmekshi qyz»: Bir-aq kúnde juldyz bolyp shyǵa keldim
Túrkistandyq Aıdana Tursyndy kópshilik «órmekshi qyz» dep ataıdy. Sebebi, ol ekinshi qabatqa eshqandaı qurylǵyny paıdalanbaı-aq erkin shyǵa alady. Boıjetkenniń bul áreketi kópshilikti tańqaldyryp otyr. Sondaı-aq, jyldamdyq pen eptilikti úılestire bilgen sulý qyzdyń túrli álemdik dodalardan da top jaryp kelgen sáti kóp, dep habarlaıdy Kazinform.
Aıdananyń sheberligi pash etilgen alǵashqy vıdeo Túrkııada tarady. Qutqarýshylar arasynda ótken álem chempıonatynda qazaqstandyq boıjetken ekinshi oryndy jeńip aldy. Qarshadaı qyzdyń ekinshi qabatqa satymen zý etip kóterilgen sáti áleýmettik jelide keńinen talqylandy. «Órmekshi qyz» degen laqap at ta sol vıdoǵa qatysty qoıylǵan bolatyn.
«Startta turǵan sátimde tanysyma telefondy berip, túsirttim. Keıin sol vıdeony óz paraqshama júktep qoıdym. Arada sanaýly mınýttar ótkende jan jaqtan quttyqtaýlar kele bastady. Jelide keńinen meni talqylap jatyr eken. Bir adamdar «Mysyq qyz» dep jazsa, endi biri «Órmekshi qyz» dep at qoıyp qoıdy. Tipti erteńine juldyz bolyp shyǵa keldim. Kóshede tanyp jatqandar, arnaıy toqtatyp sýretke túsetinder paıda boldy», - deıdi ol.
Aıdana Túrkistan oblystyq TJD-da qyzmet etedi. Sheni aǵa leıtenant.
Onymen qosa halyqaralyq dárejedegi sport sheberi. Tańerteńmen taza aýada júgirip, boı sergitse, keshkisin sport zalda jattyǵýlar jasaıdy.
Bıyl Túrkııada ótken jarysta kedergileri bar 100 metr qashyqtyqty 16 sekýnd ishinde júgirip ótti jáne 7 sekýnd ishinde ekinshi qabatqa satymen kóterilip, Qazaqstan rekordyn jańartty.
Sondaı-aq, 2022 jyly Samarqand qalasynda ótken órt qutqarý sportynan álem chempıony atandy.
«Men sportqa 18 jasymda keldim. Alǵash jeńil atletıkadan bastadym. Shymkent qalasyndaǵy Aımaqtyq áleýmettik ınnovatsııa ýnıversıtetinde «Dene shynyqtyrý jáne sport fakýltetinde» bilim aldym. Kóptegen halyqaralyq jarystardyń jeńimpazy boldym. Jattyqtyrýshylarym Danııar Abdýhalıkov pen Muzafar Irısovke alǵysymdy aıtamyn», - deıdi ol.
Aıdana sońǵy ýaqytta basqa sport túrine aýysýdy oılap júr. Sebebi, «qutqarýshylarǵa arnalǵan sport túrinde eshqandaı yntalandyrý joq», - deıdi.
«Júlde alǵandarǵa eshqandaı syıaqy berilmeıdi. Sondyqtan basqa sport túrine aýysýdy oılap júrmin», - deıdi boıjetken.
