Túrkistandyq oqýshylar álemniń úzdik joǵary oqý oryndarynan shaqyrtý aldy

TÚRKІSTAN. KAZINFORM – 11-synyp oqýshysy Nurbolat Polathan men Abdýlla Baqtıerovqa álemdik ýnıversıtetter arnaıy grant bólip otyr.

Túrkistan Bilim-Innovatsııa lıtseıiniń oqýshysy Nurbolat Polathanǵa Koreıa memleketi 100 000 AQSh dollary kóleminde grant bólmek. Ol óziniń matematıkadan respýblıkalyq jáne halyqaralyq olımpıadalarda alǵan júldelerimen kózge túsken.

Sondaı-aq, IELTS emtıhanynan 7,5 upaı jáne SAT emtıhanynan 1 510 upaı jınap óziniń aǵylshyn tilin de jetik meńgergenin dáleldegen. «KAIST» ýnıversıteti álem boıynsha eń úzdik 56 ýnıversıtettiń qataryna kiredi.

Sonymen qatar, Túrkistan Bilim-Innovatsııa lıtseıiniń 11 synyp oqýshysy Abdýlla Baqtıerov álem boıynsha eń myqty 70 ýnıversıtettiń qataryna kiretin «CityU» ýnıversıtetinen shaqyrtý alǵan.

«CityU» ýnıversıteti - Gonkong qalasynda ornalasqan. Abdýlla onda tolyq grantta oqıtyn bolady. Jas túlek bul ýaqytqa deıin ınformatıka páninen respýblıkalyq jáne halyqaralyq olımpıadalarǵa qatysyp, júldelerge ıe bolǵan.

Onyń ústine IELTS emtıhanynan 7 upaı jınaǵan.