Túrkistandyq muǵalimder úsh jyl buryn salynǵan mekteptiń sapasyna shaǵymdandy
TÚRKІSTAN. KAZINFORM — Qazyǵurt aýdany Rabat eldi mekenindegi P. Tájibaeva atyndaǵy jalpy bilim beretin mekteptiń jaǵdaıy syn kótermeı tur. Muǵalimder nysandaǵy kúrdeli aqaýlarǵa shaǵymdanyp, merdiger kompanııanyń jumysyn tekserýdi talap etti.
Mektep basshylyǵynyń málimetinshe, bilim ordasy 2023 jyly paıdalanýǵa berilgen. Alaıda bilim uıasynyń jaǵdaıy oqýshylar men qyzmetkerler úshin qaýip tóndiretin deńgeıge jetken.
Informatıka pániniń muǵalimi Bekjan Dostyń aıtýynsha, mektep qurylysy talapqa saı júrgizilmegen.
Qazirgi tańda shatyrdan sý aǵyp, qabyrǵalarda jaryqtar jıi paıda bola bastaǵan. Ásirese jaýyn-shashyn kezinde mekteptiń jertólesi sýǵa tolady.
— Máselen, órt qaýipsizdigi belgilengen normalarǵa sáıkes emes. Gıdrant júıesi tolyq aıaqtalmaǵan, sý aıdaıtyn nasostar ornatylmaǵan. Rezervýarlarǵa sý quıylǵanymen, ol saqtalmaıdy. Mektep aýmaǵyndaǵy latoktar sapasyz ornatylyp, jaýyn kezinde oqýshylarǵa qaýip tóndirgen soń alynyp tastaldy. Saldarynan sý topyraqqa sińip, jer shaıylyp, qorshaý qulap jatyr, — dedi ol.
Al dene shynyqtyrý pániniń muǵalimi Erjan Arystanbekov mektepte sporttyq ınfraqurylym talapqa saı emes ekenin aıtady.
— Fýtbol alańy tolyq aıaqtalmaǵan, jeri tegistelmegen. Tek qaqpalar ornatylǵan, gazon tóselmegen. Balalar oınaıtyn alańda rezeńke jabyn joq. Eger oqýshylar jaraqattanyp qalsa, jaýapkershilik bizge júkteledi. Basketbol alańynda da tıisti jabyn men qorshaý qarastyrylmaǵan. Sport zalynyń jeldetý júıesi elektrge qosylmaǵan. Sonymen qatar, negizgi sý qubyry tesilip, topyraqty shaıyp jatyr, — dedi ol.
Pedagogterdiń aıtýynsha, jylytý júıelerinde de kóptegen aqaý bar. Sonymen qatar shatyrdan aqqan sý elektr symdary men órt dabyly júıesin zaqymdap jatyr.
— Mektepte jedelsaty bar, biraq iske qosylmaǵan. Jylytý júıesi úsh jyl ótse de tolyq jumys istemeıdi. Qysta ǵımarattyń keı bólikteri jylymaı, oqýshylar sabaq kezinde tońyp otyrady. Qazandyqtaǵy nasostar qajetti qýattan tómen ornatylǵan. Kabınetterde jylý batareıalarynyń sany az. Ystyq sý júıesi iske qosylmaǵandyqtan, qysta sýyq sý paıdalanýǵa májbúrmiz, — deıdi mektep qyzmetkerleri.
Muǵalimderdi alańdatqan taǵy bir másele — káriz júıesiniń sapasyz ornatylýy. Onda tekserý klapandary ornatylmaǵan, qubyrlardyń túıisken jerleri durys tyǵyzdalmaı, jaǵymsyz ıis shyǵyp, sanıtarlyq jaǵdaıǵa keri áser etedi. Sonymen qatar, káriz qudyqtary sapasyz ornatylǵandyqtan, jaýyn sýy septıkke túsip, onyń jıi tolýyna ákelip otyr.
Ustazdardyń sózinshe, osyndaı olqylyqtarǵa qaramastan, nysan paıdalanýǵa qabyldanǵan. Qurylysty júrgizgen «ALTYN LTD» JShS-ne birneshe ret shaǵym joldanǵanymen, nátıje bolmaǵan. Al kepildik merzimi bıyl tamyzda aıaqtalady.
Túıtkildi máselege qatysty Kazinform tilshisine Túrkistan oblysy bilim basqarmasy resmı túsinik berdi. Vedomstvo ókilderi 200 oryndyq mektep ǵımaratynda birqatar aqaý bar ekenin rastady.
— Qazyǵurt aýdandyq bilim bólimi tarapynan tapsyrys berýshi — oblystyq qurylys basqarmasyna tıisti hattar joldandy. Qurylys basqarmasy merdiger mekeme — «ALTYN LTD» JShS-ne anyqtalǵan kemshilikterdi joıý týraly eki ret eskertý hat jiberdi. Qoldanystaǵy kelisimshartqa sáıkes, merdiger uıym nysan paıdalanýǵa berilgen kúnnen bastap 5 jyl ishinde barlyq aqaýdy óz qarajaty esebinen joıýǵa mindetti, merdiger bul talaptardy oryndaıdy, — delingen basqarma málimetinde.
Bilim basqarmasynyń habarlaýynsha, mektepte oqý protsesi shtattyq rejımde jalǵasyp jatyr.
— Anyqtalǵan kemshilikter oqýshylardyń qaýipsizdigine tikeleı qaýip tóndirmeıdi. Másele baqylaýda, tıisti jumystar ýákiletti organdarmen birlesip júrgizilip jatyr, — dep málimdedi vedomstvo.
Aıta keteıik, jýyrda mektep ujymy nysandy salǵan merdiger men ony qabyldap alǵan jaýapty tulǵalarǵa qatysty QR Bas prokýrorynyń atyna shaǵym túsirgen.
Budan buryn Qazyǵurt aýdany Aqbastaý aýylynda oqýshylar 12 jyldan beri apatty mektepte bilim alyp júrgenin jazǵan edik.