Túrkistandyq muǵalimder mekteptegi aqsha jınaý men qysymǵa qatysty dabyl qaqty
TÚRKІSTAN. KAZINFORM — Túrkistan oblysy Saryaǵash aýdanyndaǵy Tólegen Tájibaev atyndaǵy № 67 jalpy bilim beretin mekteptiń ujymy ashyq úndeý jarııalap, mektepte júıeli túrde aqsha jınalatynyn jáne basshylyq tarapynan qysym kórsetiletinin málimdedi. Oblystyq bilim basqarmasy jaǵdaıdy tekserýge arnaıy komıssııa jiberdi.
Mektep ujymynyń úndeýinde pedagogter men qyzmetkerler mektep dırektory tarapynan laýazymdyq ókilettikterdi teris paıdalaný faktileri bolýy múmkin ekenin málimdedi. Olardyń aıtýynsha, muǵalimder men oqýshylardyń ata-analarynan túrli qajettilikterge aqsha júıeli túrde jınalǵan.
Sonymen qatar pedagogter ujymǵa psıhologııalyq qysym jasalǵanyn, jekelegen qyzmetkerlerge qatysty qysym kórsetý sıpatyndaǵy áreketter bolǵanyn málimdedi. Sondaı-aq keıbir buıryqtardyń keıinnen, ıaǵnı keri kúnmen rásimdelýi jáne qujattardy burmalaý belgileri bolýy múmkin ekenin aıtty.
— Atalǵan faktilerdi rastaıtyn bank aýdarymdary týraly málimetter, WhatsApp-taǵy hat almasýlardyń skrınshottary, qujattardyń kóshirmeleri jáne basqa da materıaldar bar. Bizdiń maqsatymyz — aldyn ala bireýdi kináli dep taný emes, zańdylyqtyń saqtalýyn qamtamasyz etip, aıtylǵan faktilerge táýelsiz quqyqtyq baǵa berý. Jan-jaqty qarjylyq aýdıt júrgizip, qujattar men buıryqtardyń zańdylyǵyn tekserýdi, sondaı-aq eńbek quqyqtarynyń buzylýyna quqyqtyq baǵa berýdi suraımyz, — dedi mektep ujymy ókilderi.
Pedagogter tekserý barysynda quqyq buzýshylyq belgileri anyqtalǵan jaǵdaıda, materıaldardy quzyrly quqyq qorǵaý organdaryna joldaýdy surady.
Túrkistan oblysynyń bilim basqarmasy mektep ujymynyń úndeýine baılanysty Saryaǵash aýdanyna arnaıy komıssııa jiberilgenin habarlady.
— Qazirgi ýaqytta kóterilgen máseleler belgilengen tártippen zerdelenip jatyr. Barlyq jaǵdaıdy jan-jaqty ári obektıvti anyqtaý úshin komıssııa qurylyp, tıisti jumystar uıymdastyryldy. Tekserý barysynda barlyq taraptyń ustanymy eskerilip, qolda bar qujattar zerdelenedi, — dep habarlady vedomstvo.
Komıssııa jumysynyń qorytyndysy boıynsha mektep ujymyna resmı jaýap beriledi.
Buǵan deıin Qyzylorda oblysynda jekemenshik mektep muǵalimderiniń eńbek quqyqtarynyń buzylýyna, sonyń ishinde eńbek demalysy tólemderiniń berilmeýine qatysty shaǵymdar kóbeıgeni habarlanǵan bolatyn. Birinshi jartyjyldyqta mundaı ótinishterdiń sany 15 paıyzǵa artqan.
