Túrkistandyq 18 jasar donordyń búıregi alty balanyń ákesine buıyrdy
TÚRKІSTAN. KAZINFORM — Túrkistan oblysynda alǵash ret máıittik donordyń aǵzasyn alyp, muqtaj adamǵa salý otasy sátti ótti. Transplantatsııa tarazdyq turǵyn, 6 balanyń ákesi Darhan Ospanovqa jasaldy.
Túrkistan oblystyq klınıkalyq aýrýhanasynda jasalǵan transplantatsııalyq ota 2 saǵatqa sozyldy.
Dárigerler donordyń búıregi elimizdegi úsh adamǵa saı kelgeninen, biraq dál osy naýqastyń sáıkestigi basym bolǵanyn aıtady. Mundaı ota Túrkistan oblysynda alǵash ret jasalyp otyr.
«Qazirgi jaǵdaıda naýqastyń jaǵdaıy turaqty, narkozdan tolyǵymen oıandy. Salynǵan búırek tolyǵymen jumys istep tur. Qazir eki lıtrden astam zár shyǵyp otyr. Bul degenimiz búırek óz jumysyn oryndap deneden barlyq ýly zattardy shyǵarýda. Bolashaqta búırek dál osylaı durys jumysyn atqarýyn jalǵastyrsa, naýqasqa gemodıalez múldem qajet bolmaıdy», — deıdi Túrkistan oblystyq klınıkalyq aýrýhanasynyń bas dárigeri Janbolat Dildábekov.
Retsepıenttiń jubaıy Perızat Ábdraımova kúıeýine búıregin berýge 1 aıdan beri daıyndalyp, analız tapsyryp júrgen.
Belarýs Respýblıkasynda búırek aýystyrý otasyn jasaýǵa 30 mln teńgeden astam aqsha suraǵan kórinedi.
Dárigerler alty balanyń ákesi Darhan Ospanovqa habarlasyp, «sizge donor tabyldy» dep aıtqanda olar buǵan senbepti.
Keıin jergilikti dáriger habarlasyp, rastaǵan soń, birden zattaryn jınap, jolǵa shyqqan.
«Analız kelgenshe osy klınıkanyń aldynda qondym. Alladan qatty tiledim. Bizge buıyrdy. Júregimmen sezdim. 3-4 adamdy shaqyrdy. Kimdiki sáıkes keledi eken dep úlken úmitpen kútip otyrdyq. Keshe saǵat eki jarymda qorytyndysy kelgennen keıin dáriger bárimizdi shaqyryp, kimdiki qansha paıyz sáıkes keletinin aıtty. Birden operatsııaǵa alyp ketti», — deıdi naýqastyń jubaıy Perızat Ábdraımova.
Máıittik donordyń aǵza múshesin alyp, muqtaj adamdarǵa salý Túrkistan oblysynda alǵash ret jasalyp otyr.
Dárigerler 18 jasar jigittiń ekinshi búıregin Astanaǵa jiberip, 16 jasar balaǵa saldy.
Al, baýyry Almaty qalasynyń turǵynyna buıyrsa, júregi 58 jastaǵy shymkenttik er adamǵa salyndy.
