Qazaq-ózbek shekarasyndaǵy «Jibek joly» beketiniń ótkizý qabileti birneshe ese artady
ASTANA. KAZINFORM — Jańǵyrtylǵan «Jibek joly» beketi táýligine 70 myń jolaýshyny qabyldaı alady, dep habarlaıdy Memlekettik kirister komıtetiniń baspasóz qyzmeti.
Memlekettik kiris komıtetiniń tóraǵasy Jandos Dúısembıev Túrkistan oblysynyń ákimi Nuralhan Kósherovpen birge Saryaǵash aýdanyndaǵy «Jibek joly» ótkizý pýnktine bardy. Onda olar EAEO syrtqy shekarasynyń Qazaqstan-Ózbekstan ýchaskesindegi eń iri jolaýshylar kóligi ótkizý pýnktin aýqymdy qaıta qurý jumystarynyń barysyn tekserdi. Tekserý barysynda jobanyń qazirgi iske asyrý kezeńi, qurylys jumystarynyń qarqyny jáne 2026 jyldyń qyrkúıeginde paıdalanýǵa berilýi josparlanǵan nysannyń daıyndyǵy qarastyryldy.
Jańǵyrtylatyn ótkizý pýnkti kedendik jáne shekaralyq baqylaýdy júrgizý úshin zamanaýı joǵary tehnologııalyq jabdyqtarmen jaraqtandyrylatyn bolady.
Búgingi tańda obektide halyqaralyq standarttardy eskere otyryp jobalanǵan «eksport» jáne «ımport» baǵytyndaǵy eki bólek jańa jolaýshylar termınalynyń qurylysy aıaqtalyp qaldy. Avtobýstar men jeńil kólikterge shekaralyq jáne kedendik tekserý júrgizý úshin jalpy úlken shatyrdy montajdaý, beınebaqylaý júıelerin ornatý júrgizilip jatyr. Nysanda toqtaýsyz eki aýysymyq rejımde 270 jumysshy jumys isteıdi.
— Jańǵyrtylǵan «Jibek Joly» ótkizý pýnktiniń jobalyq qýaty táýligine 70 myń jeke tulǵa men 2 myń jeńil avtokólik jáne 200 avtobýsqa jetedi. Buǵan deıin eski ótkizý pýnktiniń jobalyq qýaty táýligine 17 myń jeke tulǵany, 400 jeńil avtokólikti jáne 20 avtobýsty quraǵan, — delingen habarlamada.
Inspektsııalaý jáne obektide avtorlyq jáne tehnıkalyq qadaǵalaý ókilderiniń qatysýymen ótkizilgen keńestiń qorytyndysy boıynsha qurylystyń merzimderi men sapasyn baqylaýdy qamtamasyz etý jáne jobany belgilengen merzimde aıaqtaýdyń barlyq sharalaryn qabyldaý tapsyryldy.
Osyǵan deıin Túrkistan oblysyndaǵy «Qaplanbek» ótkizý beketinde janjal týyp, polıtsııa is qozǵaǵanyn jazdyq.
