Túrkistandaǵy «Jasyl beldeý» jaıqalyp keledi
TÚRKІSTAN. KAZINFORM — Túrkistan qalasy aýmaǵynda «Jasyl beldeý» qurý maqsatynda otyrǵyzylǵan orman aǵashtarynyń sany artyp keledi.
Oblys ákimi Nuralhan Kósherov Birlik alqabyndaǵy «Jasyl beldeý» jumystarymen tanysyp, qaladaǵy «Jasyl aımaq» mekemesindegi orman tuqymbaǵy men jylyjaılaryn aralap kórdi. Óńir basshysy «Jasyl beldeýge» jaýaptylarǵa kóshetterdi kútip-baptaý jáne kógaldandyrý jumystaryn odan ári jandandyryp, sýarý júıesin jetildirýdi tapsyrdy.
Túrkistan qalasyn shań-tozańnan saqtap, ekologııalyq jaǵdaıyn jaqsartý maqsatynda, Prezıdent tapsyrmasyna sáıkes, 2019 jyly Túrkistan qalasynyń aınalasyna «Jasyl beldeý» quryldy. Oblys ákiminiń qoldaýymen búgingi tańǵa deıin 29 544,0 ge jer memlekettik orman qory sanatyna aýystyrylǵan. Onyń ishinde Túrkistan qalasy 2852,0 ga, Saýran aýdany 19362,0 ga jáne Otyrar aýdany 7 330,0 ga aýmaq.
Qala aınalasynan 2019-2024 jyldar aralyǵynda jalpy 18 071,0 ga jerge ártúrli japyraqty aǵashtar otyrǵyzylǵan. Atap aıtsaq, japyraqty aǵash kóshetteri – 8 337,0 ga, sekseýil ekpeleri – 9 734,0 ga.
Oblystyq tabıǵı resýrstar jáne tabıǵat paıdalanýdy retteý basqarmasynyń basshysy Qaırat Abdýalıev «Jasyl beldeýdiń» qazirgi jaǵdaıy týraly málimdep, atqarylǵan jumystar men aldaǵy josparlarǵa toqtaldy.
Orman ekpelerin sýarý maqsatynda 237 uńǵyma qazylyp, «Arys-Túrkistan» kanaly, «Qosqorǵan» sý qoımasy men Qarashyq ózeninen sý tartý júıeleri ornatyldy. Qazirgi tańda mekemeniń aýmaǵynda 90 % elektr jelisi tartylǵan. Elektr jelisi tartylǵan ýchaskelerde 24 saǵat sýarý múmkindigi bar. Al qalǵan 10 % benzındi jáne dızeldi motopompalarmen sýarylady. Mekemede 100 gektar jer aýmaǵynda aǵash-buta kóshetterin ósirýge turaqty jáne 20 gektar ýaqytsha orman tuqymbaǵy uıymdastyrylǵan.
Tuqymbaqtardyń kólemin ulǵaıtý, klımattyq jaǵdaıdy jaqsartý baǵytynda zamanaýı tuqymbaq quryldy. Búgingi tańda, 1,0 ga aýmaqty kólenkeleý, tamshylatyp sýarý júıesin ornatý, 6 jylyjaı kesheni men aýqymdy sý jınaý basseıni men jylytý qazandyǵy jáne ormanshylar úıi salyndy.
Aıta ketelik Túrkistan oblysynyń birneshe aýdany aýyz sýmen qamtamasyz etiledi.