Túrkistandaǵy zamanaýı kásiporyndar óńir ekonomıkasyna serpin beredi
TÚRKІSTAN. KAZINFORM – Túrkistan qalasynda ındýstrııalyq-ınnovatsııalyq damý baǵytynda aýqymdy jumystar júıeli túrde júrgizilip jatyr. Bul óz kezeginde zamanaýı óndiris oryndarynyń kóbeıýine, ınnovatsııalyq jobalardyń iske asýyna jáne óńir ekonomıkasynyń jandanýyna yqpal etip otyr.
Óndiris oshaqtary jańa tehnologııalyq múmkindikterdi tıimdi paıdalanyp, ınnovatsııalyq sheshimder arqyly azyq-túlik qaýipsizdigin qamtamasyz etýge jáne jergilikti turǵyndardy jumyspen qamtýǵa naqty úles qosyp keledi. Solardyń biri – jylyna 1 000 tonnadan astam nan jáne et ónimderin óndiretin «Aq Jol Fýds» jaýapkershiligi shekteýli seriktestigi.
Atalǵan kásiporyn ınnovatsııalyq tehnologııalardy óndiriske engizý arqyly otandyq ónim sapasyn arttyryp, Túrkistan oblysynyń azyq-túlik naryǵyndaǵy ornyn nyǵaıtady. Qazirgi tańda kásiporynda shujyq, sosıska jáne et ónimderiniń birneshe túri daıyndalady. Munda 80-nen astam jergilikti turǵyn turaqty jumyspen qamtylǵan. Bul óz kezeginde qalanyń áleýmettik-ekonomıkalyq damýyna oń áser etip, jumyssyzdyq deńgeıiniń tómendeýine septigin tıgizip jatyr.
Kásiporyn qyzmetimen arnaıy tanysqan Túrkistan qalasynyń ákimi Ázimbek Pazylbekuly óndiristik protsespen jáne ınfraqurylymmen tanysyp, óndiris barysyna oń baǵasyn berdi. Kezdesý barysynda kásip ıeleri óndiristi keńeıtý, ınnovatsııalyq jelilerdi jetildirý jáne ónim sapasyn arttyrý baǵytyndaǵy josparlaryn jetkizdi.
Aıta ketý kerek, búginde kásiporyn óndiristik jelilerin kezeń-kezeńimen tsıfrlyq tehnologııalarmen jańǵyrtyp, tolyq avtomattandyrý úderisin qolǵa alǵan. Zamanaýı qondyrǵylar eńbek ónimdiligin arttyryp qana qoımaı, óndiristik qaýipsizdik pen sapa standarttaryn jańa deńgeıge kóterýge múmkindik beredi.
Qala ákimi kásiporyn jumysymen tanysý barysynda otandyq taýar óndirýshilerdiń tehnologııalyq serpinin arttyrý, ınnovatsııalyq jobalarǵa qoldaý bildirý qajettigin atap ótti. Aldaǵy ýaqytta óndiris kólemin ulǵaıtý, jańa ónim túrlerin shyǵarý jáne eksporttyq baǵytty damytý – kásiporynnyń basty mejesi bolmaq.
Jalpy, Túrkistan qalasy sońǵy jyldary óndiris pen kásipkerlik baǵytynda qarqyndy damyp kele jatqan ınnovatsııalyq-ekonomıkalyq aımaqqa aınaldy. Qalada ındýstrııalyq ınfraqurylym júıeli túrde damyp, otandyq ónim óndirýshilerdiń úlesi artyp keledi. Osy oraıda jumys istep turǵan kásiporyndardy qoldaý, óndiristik qýatty arttyrý jáne jańa jumys oryndaryn ashý – óńirlik saıasattyń basym baǵyttarynyń biri sanalady.
Osy maqsatta qala basshysy «Nur Stroı LTD» jaýapkershiligi shekteýli seriktestiginiń jumysymen de tanysty. 2005 jyldan beri jumys istep kele jatqan bul óndiris orny temir-beton buıymdaryn shyǵarýǵa mamandanǵan. Búginde kásiporyn jylyna 10 myń dana jabyn plıtasy, 30 myń dana temir-beton tiregi jáne 50 myń tonna asfalt óndiredi. Ónimder qalanyń jol-qurylys salasyna qajetti materıaldarmen úzdiksiz qamtamasyz etýde.
2023 jyldyń qorytyndysy boıynsha kásiporyn 72 myń danaǵa jýyq túrli ónim óndirip, óndiristik kórsetkishterdi arttyrǵan. Qazir munda 164 adam turaqty jumyspen qamtylǵan. Kásiporyn ónimderi ST-KZ ulttyq sertıfıkatyna ıe bolyp, otandyq ári halyqaralyq sapa standarttaryna tolyq sáıkes keledi.
Qala ákimdigi tarapynan ındýstrııalyq-ınnovatsııalyq áleýetti damytý, qurylys salasyn qoldaý jáne óndiris nysandaryn ınfraqurylymmen qamtamasyz etý baǵytynda júıeli sharalar qolǵa alynyp jatyr. Bul rette ınnovatsııalyq óndiris ádisterin, avtomattandyrylǵan jelilerdi jáne zamanaýı tsıfrlyq tehnologııalardy engizý – negizgi basymdyqtardyń biri sanalady.
Ázimbek Pazylbekuly kásiporyn ókilderimen kezdesýde otandyq óndiristi ilgeriletýdiń, jańa jumys oryndaryn ashýdyń jáne jergilikti ekonomıkany ártaraptandyrýmen qatar, ınnovatsııalyq jobalardy qoldaý men engizýdiń mańyzdylyǵyn atap ótti. Óńirdegi árbir óndiris ornynyń jańǵyrýy – Túrkistannyń bolashaqta tehnologııaǵa negizdelgen, básekege qabiletti ındýstrııalyq ortalyqqa aınalýyna berik negiz qalaıdy.
Eske sala keteıik, budan buryn «Aqyldy qala» kontseptsııasy retinde Túrkistannyń jańa damý kezeńi bastalǵanyn jazǵan bolatynbyz.