Túrkistandaǵy velostantsııalar nege jumys istemeı tur
TÚRKІSTAN. KAZINFORM – Túrkistan qalasynda 2019 jyldyń qarasha aıynda pılottyq joba retinde iske qosylǵan Turkistan bike velosherıng júıesi bıyldan beri toqtap tur. Jaýapty mekemeniń málimetinshe, buǵan jobany qarjylandyrý kóleminiń jetkiliksizdigi sebep bolǵan.
Joba aıasynda qala aýmaǵynda 40 velosıpedten turatyn park pen 5 avtomattandyrylǵan velostantsııa paıdalanýǵa berilgen bolatyn.
Qazirgi tańda velostantsııalar Gúlder saıabaǵynda, Lotos gúliniń beınesindegi sýburqaq mańynda, Túrkistan qalasy ákimdigi ǵımaratynyń janynda, Arbat-2 aýmaǵynda jáne «Túrki baǵy» saıabaǵynda ornalasqan.
Veloserýendi turaqty ádetke aınaldyrǵan qala turǵyny Ǵalııa Bıseıittiń aıtýynsha, qalalyq velosherıng júıesi turǵyndardyń kúndelikti qozǵalysyn jeńildetýge múmkindik beredi.
– Saıabaqtardaǵy jeke prokat qyzmetteri kóbine belgili bir aýmaqpen shekteledi ári turaqty jumys isteı bermeıdi. Ádette tek keshki ýaqytta nemese demalys kúnderi ǵana ashylady. Tańerteń erte nemese túnde serýendegendi unatatyndar úshin olar qoljetimsiz. Al Turkistan bike táýlik boıy úzilissiz jumys isteıdi ári velosıpedti bir núkteden alyp, basqa beketke qaldyrýǵa múmkindik beredi. Bul turǵyndardyń kúndelikti qozǵalysyn jeńildetedi. Túrkistanda mundaı júıe ımıdjdik joba emes, turmystyq qajettilikke aınalýy qajet, – dedi ol.
Al tabıǵat janashyry Ǵanı Nazarbektiń pikirinshe, qalada velosıped paıdalanýshylar sany kóp bolǵanymen, olarǵa arnalǵan ınfraqurylym áli de jetkiliksiz.
– Qoǵamdyq oryndarda velosıped qoıatyn arnaıy turaqtar az. Sondaı-aq aýlalarda velosıpedke arnalǵan qolaıly orta tolyq qalyptaspaǵan. Mundaı jaǵdaılar velomádenıettiń damýyn tejeıdi, – dedi ol.
Velosherıng júıesi jumys istegen kezde aılyq abonement quny 2000 teńge bolǵan. Paıdalanýshy shotyndaǵy eń tómengi qaldyq mólsheri – 500 teńge. Abonement ıeleri 30 mınýtqa deıingi saparlardy shekteýsiz paıdalana alady. Belgilengen ýaqyttan asqan jaǵdaıda qosymsha tarıfter qarastyrylǵan.
Jobaǵa tehnıkalyq qyzmet kórsetip kelgen VB Company JShS dırektory Almagúl Qasymovanyń málimetinshe, júıe jeti jyl boıy úzdiksiz jumys istep, ásirese týrıster men jastar arasynda suranysqa ıe bolǵan.
– Jyl saıyn shamamen 850-1000 turaqty paıdalanýshy tirkeletin. Alaıda bıyl Túrkistan qalasy ákimdigi tarapynan qoldaý kórsetilmeýine baılanysty Turkistan bike iske qosylmady, – dedi kompanııa basshysy.
Túrkistan qalasy ákimdigi jolaýshylar kóligi jáne avtomobıl joldary bólimine qarasty «Túrkistan jol qyzmeti» KMM málimetinshe, velosherıng júıesin júzege asyrýǵa 2021 jyly 21,3 mln teńge, 2022 jyly 20 mln teńge, 2023 jyly 20,23 mln teńge, al 2024 jáne 2025 jyldary 25,5 mln teńge qarjy bólingen.
Mekeme deregine sáıkes, 2026 jyly jobany iske asyrýǵa 10 mln teńge qarastyrylǵan. Alaıda bul qarjy jetkiliksiz bolǵandyqtan, áleýetti merdigerler konkýrsqa qatysýǵa qyzyǵýshylyq tanytpaǵan.
– Qazirgi ýaqytta qala ákimdigi tarapynan qosymsha qarjy bólý máselesi qarastyrylyp jatyr. Qajetti qarajat bólingen jaǵdaıda memlekettik satyp alý talaptaryna sáıkes ashyq konkýrs jarııalanady, – delingen mekeme jaýabynda.
Buǵan deıin elimizdegi velosıped pen samokatty jalǵa alý quny týraly jazǵan edik.
