Túrkistandaǵy ortalyq bazarda órt qaýipsizdigi talaptary saqtalmaı otyr

TÚRKІSTAN. KAZINFORM – Túrkistandaǵy ortalyq bazarda órt qaýipsizdigi men sanıtarlyq jaǵdaı tekserildi.

Oblys ákiminiń birinshi orynbasary Zulpyhar Joldasov Túrkistandaǵy ortalyq bazardy aralap, qazirgi ahýalyn baǵalady.

Aralaý barysynda saýda oryndaryndaǵy sanıtarlyq jaǵdaı, órt qaýipsizdigi, sondaı-aq kelýshiler men satýshylar úshin jasalǵan jaǵdaı nazarǵa alyndy. Ásirese, avtoturaqtyń qolaılylyǵy, tazalyq máselesi basty baqylaýda boldy.

– Bazardyń ishki jaǵdaıy 90-jyldardan beri aıtarlyqtaı ózgermegen. Ony qazirgi talaptarǵa saı jańǵyrtyp, tıisti jaǵdaı jasaý qajet. Munda shamamen 4 myńǵa jýyq saýdager eńbek etip, nápaqasyn taýyp otyr. Olar tólem jasap keledi, alaıda soǵan laıyqty jaǵdaı qarastyrylmaǵan.

Bazar ishinde órt qaýipsizdigi talaptary da tolyq saqtalmaǵan, arnaıy datchıkter ornatylmaǵan. Al saýda oryndarynda rezeńke sııaqty tez janatyn buıymdar bar. Órt tutana qalǵan jaǵdaıda, ony der kezinde sóndirý qıynǵa soǵady, – dedi Zulpyhar Joldasov.

Oblys ákiminiń birinshi orynbasary halyqtyń qaýipsizdigi men densaýlyǵy basty nazarda ekenin atap ótti. 

Onyń sózinshe, mundaı baqylaý sharalary aldaǵy ýaqytta da jalǵasady.

– Túrkistan – kıeli shahar, oblys ortalyǵy ári týrıster kóp keletin óńir. Sondyqtan qaladaǵy árbir nysan joǵary talaptarǵa saı bolýy tıis. Osyǵan oraı, bazar aýmaǵynda qaýipsizdik talaptaryn kúsheıtý, sanıtarlyq tazalyqty saqtaý jáne tártipti retke keltirý boıynsha naqty tapsyrmalar berildi. Halyqqa da, qala qonaqtaryna da qolaıly ári qaýipsiz orta qalyptastyrý – basty mindet, – dedi ol.

Budan buryn Túrkistan oblysynda turmystyq qaldyq tastaıtyn polıgondar talapqa saı emes ekenin jazǵan edik.