Túrkistandaǵy óndiristik parkte 1 000-ǵa jýyq jumys orny qurylady
TÚRKІSTAN. KAZINFORM - Túrkistan oblysy ákiminiń qoldaýymen ınvestıtsııalyq jobalardy arttyrý maqsatynda Túrkistan oblysynyń Saýran aýdanynda «Óndiristik park» jobasynyń qurylysy qarqyndy júrgizilip jatyr.
Óndiristik park 30 gektar jerde ornalasqan jáne park aýmaǵynda 42 ǵımarat salý josparlanǵan. Búgingi tańda 10 ǵımarat paıdalanýǵa berilgen.
Jalpy Óndiristik parktiń quny 13 mlrd. teńgeni quraıdy jáne onyń qurylysy aıaqtalǵanda jańa zaýyttar salynady. Túrkistan oblysynyń ákimi Darhan Satybaldy atalǵan aýmaqqa baryp, qurylys jumystaryn qadaǵalady. Merdiger men jaýapty basqarma basshysyna jáne «Túrkistan» áleýmettik-kásipkerlik korporatsııasynyń basqarma tóraǵasyna tıisti tapsyrmalar berdi.
«Óndiristik parktegi ǵımarattar ýaqtyly tapsyrylsyn. Aldymen turmystyq tehnıka, elektronıka ónimderin shyǵaratyn zaýyttardyń ǵımarattaryn jedel aıaqtap, jobalardy bastaý kerek. Óndiristik parktegi árbir ǵımaratqa jańa jobalar izdep, kelisimshart jasaı bergen jón. Іzdenińizder, ınvestorlarmen júıeli jumysty jalǵastyryńyzdar», - dedi Darhan Satybaldy.
Jalpy óndiristik park 100 gektar jerde ornalasqan jáne park aýmaǵynda 151 ǵımarat salý josparlanǵan. Qurylys-montajdaý jumystary «Túrkistan» áleýmettik kásipkerlik korporatsııasy jáne jeke ınvestor esebinen júrgizilip jatyr. Atalǵan joba 3 kezeń boıynsha júzege asyrylady.
Birinshi kezeńde 30 gektar jerde ınvestıtsııa kólemi 154,8 mlrd. teńgeni quraıtyn 29 jobany iske asyrý josparlanǵan. Búgingi tańda 10 ǵımarattyń qurylysy aıaqtalyp, 24,7 myń sharshy metri qoldanysqa berildi. Sonymen qatar 8 joba iske asyrylyp, 36,5 mlrd. teńge ınvestıtsııa tartylǵan jáne 712 jańa jumys orny qurylýda.
Qazirgi ýaqytta Óndiristik parkte «BNK Group» JShS-niń (ınvestıtsııa quny 14,1 mlrd. teńge, 140 jańa jumys oryn) sý únemdeý tehnologııalaryn engizip, jańbyrlatyp sýarý jáne tamshylatyp sýarý júıelerin shyǵaratyn kásiporny, «Aqniet Holding» JShS (ınvestıtsııa quny 5,9 mlrd. teńge, 75 jańa jumys oryn) mektepke arnalǵan jıhazdardy óndiretin kásiporny, Ýkraınalyq «UBC Group» kompanııasy (ınvestıtsııa quny 10 mlrd. teńge, 160 jańa jumys oryn) ónerkásiptik tońazytqyshtardy óndiretin jáne ózge de kásiporyndar jumys istep jatyr.
2024 jyldyń sońyna deıin 13 ǵımaratty jáne 2025 jyldyń birinshi toqsanynda 16 ǵımaratty iske qosý josparlanǵan.
Ekinshi kezeńde 2025-2026 jyldary 70 ga aýmaqta 112 ǵımarat soǵý mejelengen.
Úshinshi kezeńde, ıaǵnı, 2025 jyly 14 ǵımaratty iske qosý josparlanǵan (ınvestıtsııa quny 35,1 mlrd. teńge). Kásipkerlerge ınjenerlik ınfraqurylymy júrgizilgen, qurylysy daıyn óndiris oryndary usynylyp, osy arqyly jumys oryndaryn kóbeıtý kózdelip otyr.
