Túrkistandaǵy naýryz merekesi túrki álemi deńgeıinde toılandy
TÚRKІSTAN. KAZINFORM - Bıyl Túrkistan – Túrki áleminiń týrıstik astanasy atandy. Bul mártebe tarıhı shahardy odan ári álemge tanytýǵa sep bolmaq.
Túrkistanda túrki elderi ónerpazdarynyń qatysýy «Armysyń, áz Naýryz!» saltanatty is-sharasy ótti. Merekelik jıynǵa halyqaralyq «Voice of Turan-2023» qazaq ánderi festıvaliniń jeńimpazdary Laelııa Alıeva (Ázerbaıjan), Tatıana Efremova (Tatarstan), Zainetdin (Bashqurtstan) keldi.
Sondaı-aq Ardaq Balajanova, Mahmýd Ýrýmbaev, «Asyl ájeler» ansambli, «Bısultan» bı ansambli, Raıymbek Seıtmetov atyndaǵy Túrkistan sazdy-drama teatrynyń jáne Qurmanbek Jandarbekov atyndaǵy Jetisaı drama teatrynyń ártisteri, «AKA» shyǵarmashylyq ortalyǵynyń oqýshylary jáne «Tumar», «Juldyzdar», «Balaýsa», «Erketaı», «Tańsholpan», «Kerýen», «Symbat» horegrafııalyq ujymdary óner kórsetti. Odan bólek kontserttik baǵdarlamaǵa «Turan» boys, «ıAssy», «Farab» bı ansamblderi Shámshi Qaldaıaqov atyndaǵy oblystyq fılarmonııasynyń jáne «Kongress holl» kópsalaly kesheniniń ónerpazdary, «Alqońyr» folklorlyq ansambli qatysyp, merekege jıylǵan kópshiliktiń kóńilin kóterdi.
«Tabıǵattyń oıanýy» men «Armysyń, áz Naýryz!» teatrlandyrylǵan mýzykalyq horeografııalyq qoıylymy men «Túrkistan» kompozıtsııasy jáne ózge de sahnalyq kórinister kópshilikke kóterińki kóńil kúı syılady. Qazaq halqynyń turmys-salt jyry sanalatyn «Jarapazan» aıtyldy. Túrki halqynyń dostyǵy men ulttyq salt-dástúr dáripteletin ánder shyrqaldy. Kıiz úıler tigilip, qonaqtarǵa esigin aıqara ashty. Ulttyq sporttyq oıyndary, atap aıtqanda qazaq kúresi, qol kúres, arqan tartý, toǵyzqumalaq, qoshqar kóterý syndy saıystar ótti. Sonymen qatar «Tusaýkeser» rásimi, qolóner sheberleri men sýretshileriniń, ulttyq taǵamdardyń kórmesi ázirlendi. Dýmandy mereke keshkisin kontserttik baǵdarlamamen jalǵasady.
Túrkistandaǵy Naýryz toıyna elimizdiń ózge óńirleri men Túrki elderinen qonaqtar keldi. Sonymen birge Eýropa men Azııa elderinen kelgen 20-ǵa jýyq BAQ ókili Ulystyń uly kúnine arnaǵan dúbirli toıdy tamashalady.
