Túrkistandaǵy Kúltóbe qalashyǵyn abattandyrý jobasy nege áli aıaqtalmady
TÚRKІSTAN. KAZINFORM — Túrkistandaǵy Kúltóbe qalashyǵynda tórt kúmbezdiń qurylysy 2025 jyly aıaqtaldy. Endi qalashyq aýmaǵyn tolyq abattandyrý jobasyn iske asyrý úshin ıÝNESKO-nyń kelisimin alý qajet. Bul týraly Túrkistan oblysynyń ákimdigi Kazinform agenttiginiń resmı saýalyna bergen jaýabynda málimdedi.
Qoja Ahmet ıAsaýı kesenesinen ońtústikke qaraı 350 metr jerde ornalasqan Kúltóbe qalashyǵynyń tarıhy b. z. d. III ǵasyrdan bastalady. Munda ashyq aspan astyndaǵy zamanaýı arheologııalyq park qurý josparlanǵan.
Resmı málimetke sáıkes, «Áziret Sultan» qoryq-murajaıynyń aýmaǵyn abattandyrý jáne qalashyqqa kúmbez ornatý jumystary 2021 jyly bastalǵan. Keıin arheologııalyq parktiń qurylysyn 2024 jyly aıaqtaý josparlanǵany habarlandy. Alaıda qalashyq aýmaǵyn tolyq abattandyrý jumystary áli aıaqtalǵan joq.
Túrkistan oblysy ákimdiginiń málimetinshe, 2021-2025 jyldary «Áziret Sultan» qoryq-murajaıynyń aýmaǵyn abattandyrý» jobasy aıasynda tórt kúmbez ornatylǵan. Merdiger — «Bazis Construction» JShS. Qurylys jumystary 2025 jyly aıaqtalyp, nysan memlekettik qabyldaý aktisimen qabyldanǵan.
Al tórt kúmbez ornalasqan aýmaqty qosa alǵanda, jalpy kólemi 8,9 gektar bolatyn Kúltóbe qalashyǵyn abattandyrý úshin jańa joba ázirlendi.
— Oblystyq energetıka jáne turǵyn úı-kommýnaldyq sharýashylyq basqarmasy tarapynan jobalaý-smetalyq qujattama ázirlenip, 2026 jylǵy qyrkúıekte memlekettik saraptamanyń oń qorytyndysy alyndy. Jobanyń quny — 3,6 mlrd teńge, — delingen ákimdik jaýabynda.
Joba aıasynda vızıt-ortalyq, mýzeı jáne kádesyı pavılondary, sýburqaqtar, aqparattyq taqtalar, jaryqtandyrý baǵanalary, kóleńkeli galereıalar men jarnamalyq qalqandar ornatý qarastyrylǵan.
— Qazirgi ýaqytta jobany iske asyrý úshin ıÝNESKO-nyń kelisimin alý maqsatynda ákimdik tarapynan «Áserdi baǵalaý esebin» ázirleý jumystary júrgizilip jatyr. Kelisim alynǵannan keıin joba qoldanystaǵy zańnama talaptaryna sáıkes iske asyrylady, — dep habarlady oblys ákimdigi.
Buǵan deıin ıAsaýı kesenesiniń kúmbezin restavratsııalaý qalaı júrip jatqanyn jazǵan edik.
