Túrkistandaǵy kórý munarasy nege jabylyp qaldy
TÚRKІSTAN. KAZINFORM — Túrkistan qalasynda abattandyrylyp, týrısterge arnalǵan nysandardyń biri retinde ashylǵan kórý munarasy qazirgi tańda ýaqytsha jumysyn toqtatqan.
Qala ákiminiń orynbasary Mekenhan Qozyhanulynyń aıtýynsha, «Telman» shaǵynaýdanyndaǵy bul munarany jańǵyrtý jumystary 2021 jyly tolyq aıaqtalǵan. Nysanǵa ishki jóndeý júrgizilip, lıft ornatyldy, joǵarǵy bóligine qalany tamashalaýǵa arnalǵan dúrbi men fotozona jasaldy. Sondaı-aq munaranyń aınalasy kógaldandyrylyp, tolyqtaı abattandyryldy.
Alaıda, nysandy paıdalaný jáne onyń turaqty jumysyn qamtamasyz etýge baılanysty týyndaǵan keıbir tehnıkalyq jáne uıymdastyrýshylyq máselelerge baılanysty nysan ýaqytsha jabyldy. Qazirgi tańda ákimdik bul máselelerdi sheshý baǵytynda jumys istep jatyr.
— Atalǵan nysan Túrkistan qalasy ákimdiginiń «Infraqurylym jáne kommýnıkatsııalar bólimi» memlekettik mekemesiniń balansynda tur. Ákimdik aldaǵy ýaqytta munarany qaıta ashyp, onyń turaqty jumysyn qamtamasyz etýdi josparlap otyr. Sonymen qatar, nysandy tıimdi basqarý úshin jaýapty mekemege nemese jeke ınvestorǵa berý máselesi de qarastyrylyp jatyr, — deligen Mekenhan Qozyhanuly usynǵan aqparatta.
Qala bıliginiń málimdeýinshe, bul qadam Túrkistannyń týrıstik áleýetin arttyrýǵa jáne nysannyń turaqty qyzmet etýine múmkindik beredi.
— Bul joba is júzinde oryndalǵan. Qazirgi mindet — týyndaǵan máselelerdi tolyq sheship, nysandy qala turǵyndary men qonaqtary úshin qaıtadan ashý. Bolashaqta bul nysan Túrkistannyń kórnekti oryndarynyń birine aınalyp, týrısterdi qabyldaıtyn bolady, — delingen aqparatta.
Aıta keteıik, budan buryn Túrkistanda salynyp jatqan joldardan kemshilikter anyqtalǵanyn jazǵan bolatynbyz.