Túrkistandaǵy kóne qalashyqtyń qorǵanyna restavratsııa jumysy júrgizilip jatyr
ASTANA. KAZINFORM – «Qazqaıtajańartý» RMK mamandary Túrkistandaǵy Qoja Ahmet ıAsaýı kesenesiniń mańynda ornalasqan kóne qalashyqtyń qorǵanyna ǵylymı-restavratsııalyq jumysty júrgizip jatyr.
Qabyrǵany qalpyna keltirý týraly sheshim monıtorıng nátıjesinde qabyldandy. Baqylaý barysynda jyl saıyn onyń 10-15 santımetrge yǵysatyny anyqtalǵan.
Josparǵa sáıkes, shyǵys qaqpadan bastap 32 metr aýmaq qalpyna keltiriledi. Al apatty jaǵdaıda turǵan qabyrǵa bóliginiń jalpy uzyndyǵy – 40 metr. Qorǵan qabyrǵasy 2000 jyldary arheologııalyq zertteýlerge sáıkes qaıta qalpyna keltirilgen.
Mádenıet jáne aqparat mınıstrligi málimetinshe, bul jolǵy ǵylymı-restavratsııalyq jumys kezinde irgetasy nyǵaıtylyp, apatty bólikten alynǵan jaramdy materıaldar saqtalyp, solardyń kómegimen qabyrǵanyń búlingen bóligi qaıta qalanady.
Júrgizilip jatqan jumystar qabyrǵanyń odan ári búlinýine jol bermeı, tsıtadeldiń soltústik-shyǵys bóliginiń tarıhı kelbetin saqtaýǵa múmkindik beredi. Ǵylymı restavratsııany 2026 jyldyń sońyna deıin aıaqtaý josparlanǵan.
Jarkent meshitinde tarıhı kelbetti saqtaı otyryp restavratsııa júrgizilip jatqanyn jazǵan edik.
Petropavlda sáýlet eskertkishteri restavratsııadan ótedi.
