Túrkistandaǵy Qolónershiler ortalyǵy qalaı jumys istep tur
TÚRKІSTAN. KAZINFORM — Túrkistan qalasyndaǵy Qolónershiler ortalyǵy qysqy rejımge kóship, qosymsha taǵy sheberler ornalastyrylyp jatyr.
Aıta keteıik, keshe atalǵan ortalyqtyń kireberisi arnaıy lentamen qorshalyp, tolyqqandy jumys istemeı turǵany týraly aqparat jarııalanǵan bolatyn.
Atalǵan máselege oraı Túrkistan qalasy ákimdigi Kazinform agenttigine resmı túsinik berdi.
Vedomstvonyń málimetinshe, qazirgi tańda Túrkistan qalasyndaǵy Qolónershiler ortalyǵy qalypty rejımde jumys istep tur.
— Ortalyqtyń ǵımaratynda sheberhanalar jumys istep, oqytý sabaqtary men sheberlik sabaqtary ótkiziledi. Qolónershiler túrli kórmelerge, sonyń ishinde halyqaralyq deńgeıdegi is-sharalarǵa belsendi qatysyp, óz ónimderin tanystyryp jatyr jáne basqa óńirler men elderdiń sheberlerimen yntymaqtastyqty damytyp keledi. Osyǵan baılanysty barlyq qolónershiler únemi ortalyq aýmaǵynda bola bermeıdi, — delingen ákimdiktiń resmı túsiniktemesinde.
Ortalyq ǵımaraty ashyq josparlaý úlgisinde, qolóner bazary formatynda salynǵan, onda óndiristik tsehtar men sheberhanalar ornalasqan.
— Jylytý maýsymynyń bastalýyna oraı qajetti tehnıkalyq jumystar júrgizildi. Qazirgi ýaqytta qosymsha qolónershiler — jeke sheberler men kásipkerlerdi ornalastyrý jumysy júzege asyp jatyr, — dedi ákimdiktiń jaýapty ókilderi.
Sondaı-aq munda sheberlerdiń jumys isteýine barlyq jaǵdaı jasalǵan, ıaǵnı jumys oryndary jabdyqtalyp, qajetti ınfraqurylymmen qamtamasyz etilgen jáne qolóner isin damytýǵa tolyq múmkindik bar.
Túrkistanda Qolónershiler qalashyǵy ashylǵanyn qyrkúıek aıynda habarlaǵan bolatynbyz.
