Túrkistandaǵy kolledjde stýdent qyzdardy uldardyń bólmesin jınaýǵa májbúrlegen — bilim basqarmasynyń jaýaby

TÚRKІSTAN. KAZINFORM — Áleýmettik jelide Túrkistan oblysy bilim basqarmasyna qarasty kópsalaly ındýstrıaldy-tehnıkalyq kolledjiniń stýdent qyzdary jataqhana ákimshiliginiń áreketine shaǵymdanǵany týraly aqparat tarady. 

Stýdentterdiń aıtýynsha, olardy er balalardyń bólmelerin jınaýǵa, sonyń ishinde eden jýyp, dárethanalardy tazalaýǵa májbúrlegen. Al bul talaptardy oryndaýdan bas tartqan jaǵdaıda, jataqhanadan shyǵarý jáne dýshty paıdalanýǵa tyıym salý jóninde eskertý jasalǵan. 

Osyǵan baılanysty Túrkistan oblysy bilim basqarmasy Kazinform tilshisine resmı túsinikteme berdi.

Vedomstvo málimetinshe, atalǵan jaǵdaı birden baqylaýǵa alynyp, arnaıy komıssııa qurylyp, tıisti zerdeleý jumystary júrgizilgen.

— Qazirgi tańda kolledjde 1072 stýdent bilim alady, onyń 80-i jataqhanamen qamtylǵan. 23-25 aqpan kúnderi ótetin oblystyq spartakıadaǵa baılanysty jataqhanaǵa qatysýshylardy ornalastyrý qajettiligi týyndaǵan. Osyǵan oraı tárbıeshi men vahta qyzmetkerleri stýdentterge aýyzsha túrde usynys bildirgen. Jataqhanada stýdent jigitterdiń ýaqytsha bolmaýyna baılanysty qyzdardan bos bólmelerde tazalyq jumystaryna kómek kórsetý suralǵan. Alaıda keıbir stýdentterdiń bas tartýyna baılanysty túsinispeýshilik týyndaǵan, — delingen habarlamada.

Qazirgi ýaqytta stýdenttermen jáne olardyń ata-analarymen túsindirý jumystary júrgizilip jatyr.

— Bilim basqarmasy bilim alýshylardyń quqyqtary men qaýipsizdigin qamtamasyz etýdi basty nazarda ustaıdy. Іshki tártip talaptaryn kúsheıtý jáne osyndaı jaǵdaılardyń aldyn alý maqsatynda qosymsha sharalar qabyldandy. Jaýapty tulǵalarǵa qatysty zańnamaǵa sáıkes tıisti sheshim qabyldanady, — dep málimdedi vedomstvo.

Budan Túrkistan oblysynda zaýyttan shyǵatyn jaǵymsyz ıiske aýyl turǵyndary narazylyq bildirgenin jazǵan edik.