Túrkistandaǵy qoǵamdyq oryndarda tegin Wi-Fi jelisi jumys istep tur
TÚRKІSTAN. KAZINFORM – Túrkistan qalasynyń ákimdigi tsıfrlandyrý salasyna erekshe kóńil bólip otyr.
Memleket basshysy Qasym-Jomart Toqaev Joldaýlarynda tsıfrlyq teńsizdikti joıý, aqparattyq tehnologııalardy keńinen engizý jáne zamanaýı ınfraqurylymdy damytý qajettigin birneshe márte atap ótti. «Tsıfrlyq Qazaqstan» memlekettik baǵdarlamasy aıasynda elimizde ınternetke qoljetimdilik – halyqtyń ómir sapasyn arttyrý men memlekettik qyzmetterdi tıimdi etý jolyndaǵy mańyzdy qadamdardyń biri retinde qarastyrylady.
Osy baǵyttaǵy jumystar Túrkistan qalasynda da júıeli túrde júzege asyrylyp keledi. Atap aıtqanda, Túrkistan qalasynda turǵyndar men týrıster úshin yńǵaıly orta qalyptastyrý maqsatynda qoǵamdyq oryndarǵa tegin Wi-Fi jelisi ornatylǵan. Bul – óńirdi tsıfrlandyrý baǵytyndaǵy ıgilikti jobalardyń biri.
Búginde Qoja Ahmet ıAsaýı kesenesi aýmaǵynda, temir jol vokzalynda, Túrkistan áýejaıy, ortalyq sýburqaq mańynda jáne Jeńis saıabaǵynda ınternet jelisine qosylýǵa múmkindik beretin symsyz baılanys núkteleri jumys istep tur. Atalǵan oryndar – kúndelikti halyq jıi shoǵyrlanatyn ári týrıstik mańyzy joǵary aımaqtar.
Wi-Fi jelisiniń qoljetimdi bolýy – kelýshiler úshin qolaıly jaǵdaı týǵyzýmen qatar, qalanyń zamanaýı kelbetin qalyptastyrýda mańyzdy ról atqarady. Máselen, Q.A.ıAsaýı kesenesine keletin týrıster tarıhı-mádenı mańyzy zor nysanmen tanysa otyryp, ınternet jelisi arqyly vırtýaldy gıdter men tsıfrlyq aqparattyq resýrstarǵa erkin qol jetkize alady. Bul óz kezeginde týrıstik qyzmettiń sapasyn arttyryp, Túrkistannyń tsıfrly týrızm áleýetin keńeıtedi.
Al temir jol vokzaly men áýejaıdaǵy Wi-Fi jelisi jolaýshylar úshin asa mańyzdy. Qoǵamdyq kólik kútip otyrǵan azamattar ýaqytyn tıimdi paıdalanyp, qajetti onlaın servıster men qosymshalardy qoldana alady. Ortalyq fontan men Jeńis saıabaǵyndaǵy ınternet jelileri de jastar men qala turǵyndary jıi jınalatyn aımaqtarda aqparattyq keńistiktiń ashyqtyǵyn qamtamasyz etip otyr.
Wi-Fi jelisine qosylý SMS-kod arqyly júzege asady. Bul ádis qaýipsizdikti qamtamasyz etip, ınternetti zań aıasynda paıdalanýǵa múmkindik beredi. Eń bastysy — qosylý men paıdalaný turǵyndarǵa tolyqtaı tegin. Búgingi tańda bul jelini 11 myńnan astam adam paıdalanyp úlgerdi. Bul — Túrkistan turǵyndary men týrıster úshin tsıfrlyq qoljetimdiliktiń artqanynyń dáleli.
Sala mamandarynyń aıtýynsha, tegin Wi-Fi núkteleri turǵyndar arasynda tsıfrlyq saýattylyqty arttyrýǵa, onlaın qyzmetterdi tıimdi paıdalanýǵa yqpal etedi. Bul bastama – qala halqynyń zamanaýı tsıfrlyq ortaǵa beıimdelýine jáne kúndelikti ómirde ınternet múmkindikterin ońtaıly qoldanýǵa baǵyttalǵan.
Túrkistan qalasy ákimdigi tsıfrlandyrý salasyna erekshe kóńil bólip otyr. Keıingi jyldary qala aýmaǵynda «Aqyldy qala» jobasy sheńberinde birqatar ınfraqurylymdyq sheshim engizildi. Olardyń qatarynda ıntellektýaldy beınebaqylaý júıeleri, «Sergek» jol qaýipsizdigi platformasy, mektep ashanalaryndaǵy bıometrııalyq júıeler men «109» biryńǵaı baılanys ortalyǵy bar.
– Túrkistan – tarıhı mura men zamanaýı tehnologııalar toǵysqan qala. Qoǵamdyq oryndardaǵy Wi-Fi jelisiniń iske qosylýy bul baǵyttaǵy oń ózgeristerdiń naqty kórinisi deýge bolady. Memlekettik deńgeıde tsıfrlyq damý – strategııalyq basymdyq retinde qarastyrylyp otyrǵan tusta, Túrkistannyń tsıfrly keńistikte alǵa basýy – óńirdiń jańa tynysy men órkenıetti kelbetin aıqyndaı túsedi. Tsıfrlandyrý – bul jaı ǵana tehnologııa emes, bul – qoǵamnyń damýyna serpin beretin tıimdi qural. Bul baǵytta qolǵa alynǵan jobalar halyqtyń kúndelikti tirshiligin jeńildetip, memleket pen azamat arasyndaǵy baılanysty nyǵaıta túsedi, - deıdi Túrkistan oblysynyń tsıfrlandyrý, memlekettik qyzmetter kórsetý jáne arhıvter basqarmasy basshysynyń mindetin atqarýshy Týrabı Ertaı.
Qazirgi ýaqytta qoǵamdyq oryndarǵa Wi-Fi jelisin ornatý jumystary kezeń-kezeńimen jalǵasyp keledi. Aldaǵy ýaqytta qalanyń ózge de saıabaqtary men demalys oryndary, halyq kóp shoǵyrlanatyn ortalyqtar ınternetpen qamtylady dep kútilip otyr.
Eske sala keteıik, budan buryn «Aqyldy qala» kontseptsııasy retinde Túrkistannyń jańa damý kezeńi bastalǵanyn jazǵan bolatynbyz.