Túrkistandaǵy «Karavan Saray» keshenine kelýshilerge 23 myńnan astam hattama toltyrylǵan

TÚRKІSTAN. KAZINFORM – «Karavan Saray» týrıstik keshenine kelýshilerge 23 myńnan astam hattama toltyrylǵan. Jalpy salynǵan aıyppul kólemi 249,5 mln teńge.

Túrkistan oblysynyń týrızm basqarmasy usynǵan málimetke súıener bolsaq, kópshilik oryndarda, sonymen qatar tarıhı-arhıtektýralyq jáne týrıstik oryndarda materıaldyq jáne mádenı qundylyqtardy joıý, múlikterdi qasaqana búldirý, belgilenbegen oryndarǵa qoqys tastaý, lastaý faktileri anyqtalǵan.

«Jyl basynan ortaq paıdalanylatyn oryndardy, saıabaqtardy, skverlerdi lastaý, onyń ishinde belgilenbegen oryndarǵa kommýnaldyq qaldyqtardy tastaý jáne qalalar men eldi mekenderdiń aýmaqtaryn abattandyrý qaǵıdalaryn buzý, sondaı-aq qalalar men eldi mekender ınfraqurylymy obektilerin buzý, jasyl ekpelerin joıý jáne búldirý faktileri boıynsha «Ákimshilik quqyq buzýshylyq týraly» Qazaqstan Respýblıkasynyń Kodeksi negizinde 23 myńnan astam hattama toltyrylyp, 249,5 mln teńgege aıyppul salyndy» - delingen basqarma aqparatynda.

«Karavan Saray» týrıstik kesheni 2021 jyly jeke ınvestor qarajaty esebinen iske qosylǵan joba bolatyn. Jalpy quny – 88 mlrd teńge. Joba premıým klastaǵy 2 qonaq úıdi, jasandy kól, saýda oryndaryn, otbasylyq demalys aýmaqtaryn, tamaqtandyrý oryndaryn, ponaramdyq attraktsıondy, SPA ortalyqty qamtıdy.

Aıta keteıik, budan buryn Túrkistan oblysynda 213 kásipker azyq-túlik baǵasyn negizsiz kótergenin jazǵan bolatynbyz.