Túrkistandaǵy eki áıel saýda ortalyǵynda balalardyń kózinshe tóbelesti
ASTANA. KAZINFORM — Túrkistandaǵy balalar oıyn alańynda eki áıeldiń arasyndaǵy janjal tóbeleske ulasyp, qylmystyq is qozǵaldy. Oqıǵa túsirilgen vıdeo áleýmettik jelilerde tarady. Ony saýda ortalyǵyna kelgen áıelderdiń biri túsirgen.
Áleýmettik jelidegi málimetke qaraǵanda, oqıǵa 7 qarashada Turan Mall saýda-oıyn-saýyq ortalyǵyndaǵy Baloo balalar oıyn alańynda bolǵan. Vıdeo avtorynyń aıtýynsha, kelýshilerdiń biri basqa áıeldiń balasyn qaǵyp ketkennen keıin daý shyqqan. Osydan soń balanyń anasy ne bolǵanyn anyqtaý úshin oǵan jaqyndaǵan.
Jarııalanǵan vıdeoda áıelderdiń saýda ortalyǵyna kelgen adamdardyń kózinshe sózge kelip qalǵany kórinedi. Bir sátte olardyń biri ekinshisin ıterip jiberedi. Buǵan jaýap retinde ekinshi áıel oǵan birneshe ret soqqy jasaǵan. Oqıǵa eresekter men balalardyń kóz aldynda bolǵan.
Túrkistan oblystyq polıtsııa departamentiniń resmı ókili Gúlnar Ábdijapparova jaǵdaıǵa qatysty túsinik berdi.
— Túrkistandaǵy saýda ortalyqtarynyń biriniń oıyn alańynda bolǵan janjal faktisine baılanysty qylmystyq is qozǵaldy. Aldyn ala málimetter boıynsha eki qatysýshy arasynda janjal oryn alyp, sońy bireýiniń dene jaraqatyn alǵan tóbeleske ulasqan, — dedi Gúlnár Ábdijapparova.
Kúdiktiniń kim ekeni anyqtalyp, tergeý áreketterin júrgizý úshin polıtsııa basqarmasyna jetkizildi. Qazir tergeý jalǵasyp jatyr. Іske qatysty ózge málimetter tergeý múddesine baılanysty jarııalanbaıdy.
Eske salaıyq, buǵan deıin Almatydaǵy Meladze kontsertinde tóbeles shyǵarǵan áıel bes táýlikke qamalǵanyn habarlaǵanbyz.
