Túrkistandaǵy Batys Eýropa — Batys Qytaı avtomagıstraline balama jol qurylysy nege kesheýildep jatyr
TÚRKІSTAN. KAZINFORM — Túrkistan arqyly ótetin Batys Eýropa — Batys Qytaı halyqaralyq avtodálizinde kólik qozǵalysy jyl saıyn artyp keledi. Qazirgi tańda qala ortalyǵy arqyly táýligine shamamen 8 myńǵa jýyq júk kóligi qatynaıdy.
Bul jaǵdaı kólik keptelisin kúsheıtip qana qoımaı, joldyń tez tozýyna da áser etip otyr. Sonymen qatar aýyr júk kólikteriniń qala ishin kesip ótýi turǵyndar men júrgizýshilerge qolaısyzdyq týǵyzady. Osy máseleni sheshý maqsatynda Túrkistannyń shyǵys bóliginde uzyndyǵy 30 shaqyrym bolatyn aınalma jol salý josparlanǵan.
Buǵan deıin oblys ákimdigi jobany «China Railway Asia-Europe Construction Investment Co., Ltd.» kompanııasy júzege asyratynyn habarlaǵan bolatyn. Atalǵan kompanııa Astanadaǵy LRT jobasyna qatysqan. Qurylys jumystaryn 1,5 jyl ishinde aıaqtaý kózdelgen. Al jobany iske asyrýdy 2025 jyldyń qyrkúıek aıynda bastaý josparlanǵan edi.
Sodan bergi bir jylǵa jýyq ýaqyt ishinde qandaı jumystar atqaryldy? Osy saýaldy Kazinform tilshisi Túrkistan oblysy jolaýshylar kóligi jáne avtomobıl joldary basqarmasyna joldady.
Vedomstvonyń málimetinshe, M-32 Samara — Shymkent avtojolyna balama baǵyt retinde qarastyrylǵan «Túrkistan qalasynyń shyǵys aınalma jolyn salý» jobasy úsh ýchaskege bólingen. Alaıda joba boıynsha jobalaý-smetalyq qujattamaǵa túzetýler engizilip jatyr.
Birinshi ýchaskeniń uzyndyǵy — 5 shaqyrym. Jobanyń quny 9,1 mlrd teńgeni quraıdy. Bul bólik boıynsha memlekettik saraptamanyń oń qorytyndysy alynǵan. Ekinshi ýchaskeniń uzyndyǵy — 11 shaqyrym. Boljamdy quny — 21 mlrd teńge. Memlekettik saraptamanyń oń qorytyndysyn bıylǵy maýsym aıynda alý josparlanyp otyr. Al úshinshi ýchaskeniń uzyndyǵy — 14 shaqyrym. Quny — 28 mlrd teńge. Bul bólik boıynsha da memlekettik saraptamanyń oń qorytyndysy alynǵan.
— Qazir qurylys aýmaǵyna kiretin jer telimderin memleket muqtajyna alý jumystary júrgizilip jatyr. Jol Túrkistan qalasy men Saýran aýdanynyń aýmaǵy arqyly ótedi. Túrkistan qalasy boıynsha jalpy sany 71 jer telimi (98,82 gektar), al Saýran aýdanynda 245 jer telimi (165 gektar) rezervke qoıylǵan. Qazir jerge ornalastyrý jobasyn ázirleý qolǵa alynǵan, — delingen basqarma usynǵan aqparatta.
Sondaı-aq Saýran aýdany ákimdigi tarapynan qurylys bazasyn ornalastyrý úshin 5 gektar jer telimi bólinip, tıisti qaýly qabyldanǵan. Jobanyń áleýmettik-ekonomıkalyq mańyzyn eskere otyryp, oblys ákimdigi jergilikti bıýdjet esebinen qarjylandyrýǵa kelisim berý týraly Úkimet basshysynyń atyna 2025 jylǵy shildede hat joldaǵan.
— Jobany iske asyrý máselesi Kólik mınıstrligi, Qarjy mınıstrligi jáne Ulttyq ekonomıka mınıstrligi deńgeıinde talqylandy. Sonymen qatar jobanyń birinshi jáne úshinshi ýchaskeleri boıynsha túzetilgen qujattar memlekettik saraptamaǵa joldandy. Nátıjesinde 2025 jylǵy jeltoqsanda memlekettik saraptamanyń oń qorytyndysy alyndy, — dep málimdedi oblystyq jolaýshylar kóligi jáne avtomobıl joldary basqarmasy.
Vedomstvo ókilderiniń habarlaýynsha, atalǵan jol qurylysy bıyl maýsym aıynda bastalyp, 2028 jyly jeltoqsan aıynda aıaqtalady dep josparlanyp otyr.
Buǵan deıin 2022 jyly qurylysy bastalǵan Arystanbab pen ıAsaýı kesenelerin jalǵaıtyn 4 jolaqty joldyń qashan aıaqtalatyny týraly jazǵan edik.
