Túrkistandaǵy alma baǵyna 70 myńnan astam kóshet otyrǵyzylǵan

TÚRKІSTAN. KAZINFORM — Túrkistan oblysynda ıntensıvti alma baǵy jobasy iske asyrylyp jatyr. Bul týraly QR AShM baspasóz qyzmeti málim etti.

Ordabasy aýdanynda «QazGarden» ıntensıvti alma baǵyn jáne súıekti jemis-jıdek daqyldaryn otyrǵyzý boıynsha ınvestıtsııalyq joba belsendi túrde júzege asyrylyp otyr.

Jobanyń bastamashysy – negizgi qyzmet baǵyty dándi jáne súıekti jemis daqyldaryn ósirý.  

Joba aıasynda 240 gektar baqty kezeń-kezeńimen otyrǵyzý kózdelgen. Búgingi kúni 60 gektar jer ıgerildi, onyń ishinde 11 gektaryn ıntensıvti alma baǵy, 49 gektaryn órik, shabdaly, nektarın jáne alhory quraıdy.

Jobany júzege asyrý úshin 2020 jyly Túrkııadan joǵary sapaly jemis aǵashtarynyń kóshetteri satyp alyndy, zamanaýı tamshylatyp sýarý júıesi jáne burshaqtan qorǵaıtyn tor ornatyldy. Barlyǵy 70 myńnan astam kóshet otyrǵyzyldy.

Kásiporyn arnaıy aýyl sharýashylyǵy tehnıkasymen, sonyń ishinde traktorlarmen, búrikkishtermen, shaǵyn tıegishtermen jáne basqa da jabdyqtarmen qamtamasyz etilgen, bul óndiristik úderisterdiń tıimdiligin arttyrýǵa múmkindik beredi.

Jobanyń ınvestıtsııa kólemi 700 mln teńgeni qurady, al kásiporyn aktıvteriniń aǵymdaǵy quny 2 mlrd teńgege baǵalanyp otyr. 

Aldaǵy ýaqytta baq aýmaǵyn keńeıtý jáne óndiristik bazany damytý josparlanýda.

Joba óńirdiń agroónerkásiptik áleýetin nyǵaıtýǵa, jańa jumys oryndaryn qurýǵa, sondaı-aq básekege qabiletti ári eksportqa baǵyttalǵan aýyl sharýashylyǵy óniminiń kólemin arttyrýǵa yqpal etedi.

Eske sala keteıik, buǵan deıin elimizde agrarlyq týrızm qyzmetiniń erejeleri ázirlenip jatqanyn jazǵan edik.