Túrkistandaǵy áleýmettik ortalyqta adamdar otyrǵan jerde dezınfektsııa júrgizilgen
TÚRKІSTAN. KAZINFORM – Túrkistan oblysyndaǵy №2 arnaýly áleýmettik qyzmetter kórsetý ortalyǵynda azamattar otyrǵan bólmede dezınfektsııa júrgizilgeni túsirilgen vıdeo áleýmettik jelide jarııalandy.
Beınejazbada arbada otyrǵan azamat dezınfektsııa jumystarynyń aldyn ala eskertýsiz júrgizilgenin aıtqan. Sondaı-aq kadrlardan bir adamnyń qarııanyń kıiminen ustap, ony tysqa shyǵarýǵa tyrysqany kórinedi. Jazba avtory dezınfektsııa talaptarynyń saqtalýy, qoldanylǵan preparattyń túri jáne qyzmetkerlerdiń jeke qorǵanysh quraldarymen qamtamasyz etilýine qatysty saýaldar qoıǵan.
Jaǵdaıǵa baılanysty Túrkistan oblysynyń jumyspen qamtýdy úılestirý jáne áleýmettik baǵdarlamalar basqarmasy resmı túsinik berdi.
Vedomstvonyń málimetinshe, beınejazba qazirgi jaǵdaıdy kórsetpeıdi. Vıdeoda beınelengen qarııa mekemeniń ishki tártip qaǵıdalaryn buzýyna baılanysty 2024 jylǵy 26 jeltoqsanda ortalyqtan shyǵarylǵan.
– Osyǵan oraı, beınejazbany qazirgi jaǵdaı retinde taratý shyndyqqa sáıkes kelmeıdi. Sonymen qatar qyzmet alýshynyń áleýmettik-medıtsınalyq saraptama qorytyndysyna qatysty shaǵymy qaralyp jatyr. Azamattyń múgedektik tobyn ózgertý týraly sheshim qabyldaý mekemeniń quzyretine kirmeıdi. Bul másele tıisti ýákiletti organnyń qorytyndysy negizinde sheshiledi, – delingen basqarma usynǵan jaýapta.
Sondaı-aq dezınfektsııalyq jumystardyń belgilengen aýmaqta, ıaǵnı dálizde júrgizilgeni habarlandy.
– Jumys barysynda qyzmet alýshylardyń jaǵdaıy medıtsına qyzmetkerleriniń baqylaýynda boldy. Basqa qyzmet alýshylardyń densaýlyǵyna zııan keltirgen jaǵdaı tirkelmedi, – dep málimdedi basqarma.
Buǵan deıin Túrkistan oblysynda naýqastar emdelip jatqan kezde aýrýhanada jóndeý júrgizilgenin jazǵan edik.
