Túrkistandaǵy 5 myń oryndyq meshittiń qurylysy qashan aıaqtalady
TÚRKІSTAN. KAZINFORM — Qazirgi tańda Túrkistan qalasyna kireberiste salynyp jatqan 5 myń oryndyq meshittiń 80% qurylysy aıaqtalǵan.
Kórshi Ózbekstan memleketiniń Túrkistanǵa tartýy retinde boı kótergen bul meshittiń irgetasy 2019 jyly qalanǵan.
— Búginde meshittiń kúmbezi men munaralary qoıylyp, ishki árleý jumystary bitken. Tek syrtqy qasbeti men abattandyrý jumystary júrgizilip jatyr. Bıyl jeltoqsan aıynyń sońyna deıin meshitti paıdalanýǵa berý josparlanyp otyr, — dedi Túrkistan oblystyq din isteri basqarmasynyń ókilderi.
Shyǵystyq naqyshtaǵy eńseli meshitte 8 myń jamaǵat (meshit ishi — 5 myń oryn, syrty — 3 myń oryn) bir mezgilde sájdege bas tıgizip, qulshylyq ete alady. Jeriniń aýmaǵy — 7,7 ga.
Jalpy búginde elimizde 2964 meshit bar bolsa, sonyń 744-i — Túrkistan oblysynda. Óńirdegi meshitter sany respýblıkanyń 26%-yn quraıdy.
Budan buryn Túrkistan oblysy Shardara aýdanynda ákesine qol kótergen azamattyń meshitte azanshy bolmaǵany týraly jazǵan edik.