Túrkistandaǵy 4 jasar sábıdiń óliminen keıin káriz qudyqtary jappaı tekserilip jatyr
Túrkistandaǵy 4 jasar sábıdiń óliminen keıin tártip saqshylary káriz qudyqtaryn jappaı tekserip jatyr. Arnaıy júrgizilip jatqan reıd jumystary barysynda ashyq turǵan káriz qudyqtary boıynsha atqarýshy organǵa hat joldanýda, dep habarlaıdy Kazinform.
Túrkistan oblysynyń tártip saqshylary 3 kún ishinde 266 beti ashyq qalǵan káriz qudyǵyn anyqtaǵan. Olar boıynsha arnaıy akt túzip, atqarýshy organdarǵa hat joldaǵan. Nátıjesinde qaqpaǵy joq káriz qudyqtary qaıta jabylyp jatyr. Máselen, Otyrar aýdany boıynsha beti ashyq qalǵan 50 qudyqshanyń qaqpaqtary qaıta qalpyna keltirildi.
Reıdtik jumystar barysynda polıtsııa qyzmetkerleri temir qabyldaıtyn oryndarǵa baryp, túsindirme jumystaryn júrgizdi. Qaqpaq urlap satatyndar men zattyń urlanǵanyn bile tura qabyldaýshylar zań aldynda jaýap beretindigin eskertti.
«Negizinen mundaı qudyqtardy tekserý, baqylaý polıtsııanyń quziretine kirmeıdi. Desekte 4 jasar balanyń káriz qudyǵyna túsip, qaıtys bolýy búkil qazaq eline aýyr tıdi. Sondyqtan, polıtsııa departamentiniń bastyǵy Murat Qabdenov ashyq qalǵan káriz qudyqtaryn anyqtaý boıynsha jeke quramǵa qatań tapsyrma berdi. Al, qaıtys bolǵan 4 jasar balaǵa qatysty birqatar saraptamalar taǵaıyndaldy. Zertteý qorytyndysymen zańdy sheshim qabyldanady» - dedi Túrkistan oblysy polıtsııa departamentiniń baspasóz qyzmetiniń jetekshisi Gúlnar Ábdijapparova.
Aıta keteıik, budan aldyn Túrkistanda joǵalǵan 4 jasar balanyń denesi kórshi úıdiń káriz qudyǵynan tabylǵanyn jazǵan bolatynbyz.
