Túrkistanda jýrnalıstiń urlanǵan kóligi birneshe saǵat ishinde tabyldy
ASTANA. KAZINFORM – Túrkistan qalasynda polıtsııa qyzmetkerleri zańsyz aıdap áketilgen avtokólikti birneshe saǵat ishinde taýyp, kúdiktini anyqtady, dep habarlaıdy Polisia.kz.
Túrkistan qalalyq polıtsııa basqarmasyna jýrnalıst habarlasyp, jumys ornynyń aldynda turǵan ózine tıesili kólikti belgisiz bireý aıdap ketkenin aıtqan.
Atalǵan derek boıynsha sotqa deıingi tergep-tekserý bastaldy.
Oqıǵa orny tekserilip, qaladaǵy beınebaqylaý kameralarynyń jazbalary zerdelendi. Júrgizilgen jedel-izdestirý is-sharalarynyń nátıjesinde kúdikti birneshe saǵat ishinde anyqtaldy.
– Avtokólikti zańsyz aıdap ketken kúdikti Túrkistan qalasynyń jumyssyz turǵyny bolyp shyqty. Qazirgi ýaqytta kólik aıǵaqty zat retinde tárkilenip, arnaıy aıyp turaǵyna qoıyldy, – delingen habarlamada.
Qazir is boıynsha sotqa deıingi tergep-tekserý amaldary júrgizilip jatyr.
Óz kezeginde kólik ıesi polıtsııa qyzmetkerleriniń kásibı ári jedel áreketine alǵys bildirdi.
– Polıtsııa qyzmetkerleriniń kásibı jumysyna shynaıy alǵysymdy bildiremin. Olardyń jedel áreketiniń arqasynda avtokóligim az ýaqyttyń ishinde tabyldy. Osy oraıda Túrkistan oblysy polıtsııa departamentiniń bastyǵy Arystanǵanı Zapparovqa jáne izdestirýge qatysqan barlyq qyzmetkerlerge erekshe rızashylyǵymdy jetkizemin, – dedi Aıgerim Aıtahanova.
Aıta keteıik, Taraz turǵyny urlanǵan kólikti satyp alyp, sot arqyly 6,5 mln teńgesin óndirip aldy.
