Túrkistanda júrgizýshi kýáliginsiz kólik tizgindep, qaýipti manevr jasaǵandar jazalandy
TÚRKІSTAN. KAZINFORM — Túrkistan oblysynda jol qozǵalysy erejesin óreskel buzǵan toı kortejiniń júrgizýshileri jaýapqa tartyldy.
Áleýmettik jelide Ordabasy aýdanynda kósheniń qaq ortasynda otshashý atyp, jol qozǵalysyna qaýip tóndirgen toı kortejiniń vıdeosy tarady.
Oblystyq polıtsııa departamentiniń málimetinshe, beınebaqylaý kameralary arqyly Ordabasy aýdanynyń Temirlan aýylyndaǵy ortalyq kóshelerdiń birinde úılený toıynyń kortejine qatysqan kólik júrgizýshileriniń jol qozǵalysy erejelerin buzǵany belgili boldy.
Tekserý barysynda Mercedes-Benz, BMW, LADA jáne VAZ avtokólikterin tizgindegen júrgizýshilerdiń jeke basy anyqtaldy.
— Olarǵa júrgizýshi kýáliginsiz kólik basqarǵany, qos tutas jolaq syzyǵyn kesip ótkeni, arnaıy jaryq belgilerin zańsyz ornatqany, sondaı-aq jol qozǵalysynyń basqa qatysýshylaryna qaýip tóndiretin manevrler jasaǵany úshin ákimshilik hattamalar toltyryldy, — delingen polıtsııa habarlamasynda.
Tártip buzǵan júrgizýshilerdiń avtokólikteri aıyp turaǵyna qoıyldy.
Polıtsııa departamenti júrgizýshilerdi jol qozǵalysy erejelerin qatań saqtaýǵa, ózge jol qozǵalysyna qatysýshylardyń ómiri men densaýlyǵyna qaýip tóndiretin áreketterge jol bermeýge shaqyrdy.
Buǵan deıin Túrkistanda jol erejesin buzǵan 100-ge jýyq elektrli kólik aıyp turaǵyna qoıylǵanyn habarlaǵan edik.
