Túrkistanda Joldaýdyń negizgi mindetteri túsindirildi
ASTANA. KAZINFORM — Búgin Quryltaı depýtaty Dıhan Qamzabekuly, Qazaqstan Halyq Keńesiniń múshesi Abdýlla Ismatýllaev, Aýyl sharýashylyǵy vıtse-mınıstri Nazgúl Hatepova jáne Sý resýrstary jáne ırrıgatsııa vıtse-mınıstri Talǵat Momyshev Túrkistan qalasynyń turǵyndarymen birqatar kezdesý ótkizdi.
Jumys sapary aıasynda respýblıkalyq top ókilderi áleýmettik jáne qoǵamdyq nysandardy aralap, azamattyq jáne ǵylymı qoǵamdastyq ókilderimen, stýdenttermen, qala turǵyndarymen jáne medıtsına salasynyń qyzmetkerlerimen kezdesti. Jıynda Memleket basshysynyń «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýynyń basym baǵyttary talqylandy.
Dostyq úıinde qala turǵyndarymen ótken basqosýda Joldaýda belgilengen strategııalyq mindetter, qoǵamdyq kelisim men jalpyulttyq birlikti nyǵaıtý, jastardyń azamattyq belsendiligin arttyrý jáne ulttyq qundylyqtardy dáripteý máseleleri qarastyryldy.
Quryltaı depýtaty Dıhan Qamzabekuly baǵdarlamalyq qujattyń negizgi tujyrymdaryna keńinen toqtaldy.
– Memleket basshysynyń Joldaýynda aıqyndalǵan ıdeologııalyq baǵyttardyń mańyzy zor. Eldiń damýy tek ekonomıkalyq ósimmen nemese ınfraqurylymdy jańǵyrtýmen ǵana ólshenbeıdi. Eń aldymen, ol azamattardyń sanasy men qoǵamdyq qundylyqtarǵa baılanysty. Búginde bizge bilimdi, eńbekqor, otanshyl ári ınnovatsıalyq turǵyda oılaıtyn jas urpaq qajet. Osy tusta adaldyq, ádildik, zańǵa qurmet jáne qoǵamdyq kelisim qaǵıdattaryn nyǵaıtý – strategııalyq mindetterdiń biri. Ásirese jastardyń elge qyzmet etýge, ulttyq qundylyqtardy saqtaýǵa jáne zamanaýı tehnologııalardy meńgerýge degen umtylysyn qalyptastyrý aıryqsha mańyzdy, – dedi Dıhan Qamzabekuly.
Depýtattyń aıtýynsha, Joldaýda kóterilgen bastamalar árbir qazaqstandyqtyń kúndelikti ómirinen kórinis tabýy tıis. Óıtkeni shynaıy otanshyldyq sózben emes, adal eńbekpen, sapaly bilimmen, qoǵamdyq ómirge belsendi aralasýmen jáne el bolashaǵyna beıjaı qaramaýmen ólshenedi.
Dıhan Qamzabekuly jańa tarıhı kezeńdegi memlekettiń tabysty damýy, eń aldymen, ortaq qundylyqtarǵa negizdelgen sanaly qoǵam men azamattyq jaýapkershilikten bastalatynyn atap ótti.
Osydan soń jumys tobynyń músheleri Qoja Ahmet ıAsaýı atyndaǵy Halyqaralyq qazaq-túrik ýnıversıtetine baryp, ǵylymı qoǵamdastyq jáne professor-oqytýshylar quramymen kezdesti. Bas qosýda bilim men ǵylymdy damytý, ǵylymı áleýetti arttyrý, qoǵamdyq kelisimdi nyǵaıtý, agrarlyq sektordy jańǵyrtý jáne sý resýrstaryn tıimdi paıdalaný máseleleri talqylandy.
Odan soń delegatsııa músheleri «Uly Dala eli» ortalyǵynda Halyqaralyq týrızm jáne meımandostyq ýnıversıtetiniń stýdentterimen kezdesti. Ashyq dıalog barysynda spıkerler Memleket basshysynyń Joldaýynda belgilengen basymdyqtardy túsindirip, el damýyndaǵy jastardyń róline, azamattyq jaýapkershilik pen ulttyq birliktiń mańyzyna, sondaı-aq aýyl sharýashylyǵy men sý resýrstaryn tıimdi basqarý mindetterine toqtaldy. Kezdesý sońynda stýdentter ózderin tolǵandyrǵan suraqtaryn qoıyp, usynys-pikirlerin bildirdi.
