Túrkistanda jol sapasyna salǵyrt qaraǵan merdigerler mekemelerge aıyppul salyndy

ASTANA. KAZINFORM — Túrkistan oblysynda jol sapasyna qatysty talaptardy ýaqytynda oryndamaǵan merdiger mekemeler jaýapqa tartyldy. 

«Jol aktıvteriniń sapasy ulttyq ortalyǵy» RMK Túrkistan oblystyq fılıalynyń bólim basshysy Qaırat Shákirovtyń aıtýynsha, jyl basynan beri ortalyq mamandary 272 nysandarǵa 761 ret tekserip baryp, 405 aqaý anyqtaǵan. Merdigerler men tapsyrys berýshige kemshilikterdi túzetý týraly nusqaý bergen. Sonyń 146-sy ǵana eskertýden nátıje shyǵaryp, talaptardy oryndaǵan.

Sondaı-aq mamandar jańadan tóselgen asfalt joldardan 2 260 synama alynǵan. Onyń ishinde 604 synama normatıvtik talaptarǵa sáıkes kelmegen. Nusqama berilgen soń 223 synama boıynsha kemshilikter túzetilgen. Qalǵan olqylyqtar boıynsha jumystar atqarylyp jatyr.

— Óz jumystaryna nemquraıdy qaraǵan mekemelerdi tezge salý úshin Ulttyq sapa ortalyǵy Túrkistan oblysynyń memlekettik sáýlet-qurylys baqylaýy basqarmasyna 22 ret hat joldaǵan. Sonyń ishinde 6 tehnıkalyq qadaǵalaýshyǵa jáne 4 merdiger mekemesine jalpy kólemi 11,4 mln. teńgege aıyppul salyndy. Sonymen qatar 3 tehnıkalyq qadaǵalaýshylardyń attestaty 6 aıǵa toqtatyldy, - dedi Qaırat Shákirov. 

Aıta keteıik, jaqyn ýaqytta Almatyda júrgizýshilerge «vafeldi» jol tańba erejesin buzǵany úshin aıyppul salyna bastaıdy.