Túrkistanda jertólesi sýǵa tolǵan úıdiń máselesi bes jyldan beri sheshilmeı keledi
TÚRKІSTAN. KAZINFORM – Túrkistan qalasy Jańa qala shaǵynaýdany 21/1 mekenjaıyndaǵy kópqabatty úı turǵyndary sapasyz salynǵan úıge narazylyq bildirdi.
Jeti qabatty úıdegi páterlerin turǵyndar bes jyl buryn memlekettik baǵdarlama arqyly alǵan. Sodan beri úıdiń shatyrynan aqqan sý jertóleni toltyryp, qabyrǵalar zák tartqan.
Turǵyndardyń aıtýynsha, jańbyr jaýǵan saıyn únemi ylǵal men jaǵymsyz ıis paıda bolady. Saldarynan olar sý aǵatyn jerlerge shelek qoıýǵa májbúr.
– Kúnde janymyzdy shúberekke túıip otyramyz. Jańbyr jaýsa, tipti qorqamyz. Jertólesi de esh qurǵamaıdy, únemi sasıdy. Bes jyl ishinde qubyrlar jıi isten shyqty, ony 5-6 ret óz qarajatymyzǵa aýystyrdyq. Jaǵymsyz ıisten arylý úshin jıi dezınfektsııa jasaımyz, ony da óz qaltamyzdan tóleımiz, – dedi úı tóraıymy Qarakóz Beısenova.
Turǵyndar qurylysshylar men tıisti bılik ókilderin birneshe márte shaqyrǵanymen, merdiger tarapynan naqty áreket bolmaǵan.
Atalǵan úıdi «Aq ordasy» merdiger kompanııasy salǵan. Qazirgi tańda nysannyń bes jyldyq kepildik merzimi aıaqtalǵan.
– Biz kompanııamen sottasyp, eki jyl ýaqyt ótkizdik. Sot bizdiń paıdamyzǵa sheshildi, bárin jasaıdy dep ýáde berildi, biraq nátıje joq. Ózim osy úı úshin ıpotekaǵa aıyna 120 myń teńge tóleımin, – deıdi turǵyn Erjan Aryn.
Sonymen qatar turǵyndar qys kezinde tońyp, páterlerdiń ishi kógergenin jetkizdi. Kireberistegi elektr symdary da jıi ylǵal kúıde bolady.
Túrkistan qalasynyń ákimi Ázimbek Pazylbekuly turǵyndardy birneshe jyldan beri ábigerge salǵan máselege qatysty jaýap berdi.
Qala ákiminiń aıtýynsha, atalǵan másele jaqyn arada sheshimin tabady.
– Bul jumysty óz kúshimizben atqaramyz. Tez arada bastaımyz. Páter ishine kirmeımiz, al kireberisterdi, shatyrdy, jertóleni jáne úıdiń qasbetin jóndeımiz. Jumysty qalalyq qurylys bólimi júrgizedi, ózim qadaǵalaımyn. Osy aptada qajetti materıaldardy alyp, iske kirisemiz. Sabyr saqtańyzdar. Bes jyldan beri kóterilip kele jatqan máseleni aldaǵy naýryz aıynda túbegeıli sheshemiz, – dedi qala ákimi.
Budan buryn Túrkistanda jańadan salynǵan kópqabatty úıdiń edeni tómen túsip, irgesi ajyraǵanyn jazǵan edik.