Túrkistanda Jasyl aımaqtyń 550-ge jýyq jumysshysynyń jalaqysy ýaqtyly tólenbegen

TÚRKІSTAN. KAZINFORM – Túrkistanda aǵash otyrǵyzý, olardy kútip-baptaý jáne óńirdiń ekologııalyq jaǵdaıyn jaqsartýmen aınalysatyn «Jasyl aımaq» KMM-de taǵy da zań buzý anyqtaldy.

Bul joly mekeme basshylyǵy 550-ge jýyq jumysshynyń eńbekaqysyn ýaqtyly tólemegen. Atalǵan derek prokýrorlyq tekserý barysynda belgili boldy.

Oblystyq prokýratýranyń málimetinshe, anyqtalǵan zańbuzýshylyqtar úshin mekeme basshysy men bas esepshisi tártiptik jaýapkershilikke tartyldy.

– Zańbuzýshylyqtardy joıý maqsatynda prokýrorlyq qadaǵalaý aktisi engizilip, onyń nátıjesinde 548 jumysshyǵa jalpy somasy 28 710 432 teńge eńbekaqy tolyq kólemde tólendi, – dep málim etti vedomstvo.

Eske salsaq, ótken jyldyń naýryz aıynda Túrkistan qalalyq soty oblystyq tabıǵat paıdalaný jáne tabıǵı resýrstar basqarmasy janyndaǵy «Jasyl aımaq» KMM burynǵy basshysy I. Begasylovqa, onyń orynbasary A. Ernazarovqa, KMM zańgeri M. Aınabekovaǵa jáne kásipker I. Mýslımovqa qatysty úkim shyǵarǵan.

Olar tehnıkalyq erekshelikke jáne qoıylatyn sapa talaptaryna sáıkes kelmeıtin arzan pestıtsıdter men gerbıtsıdterdi satyp alý arqyly 14,9 mln teńge somasynda bıýdjet qarajatyn jymqyrǵany úshin kináli dep tanylǵan.