Túrkistanda «Jasyl aımaq» mekemesiniń burynǵy basshysy sottaldy
ASTANA. KAZINFORM — Túrkistan oblysynyń Tabıǵat paıdalaný jáne tabıǵı resýrstar basqarmasyna qarasty «Jasyl aımaq» KMM-niń burynǵy basshysyna qatysty sot úkimi shyqty.
Sybaılas jemqorlyqqa qarsy is-qımyl agenttigi atap ótkendeı, Memleket basshysynyń tapsyrmalaryn oryndaý sheńberinde áleýmettik sezimtal salalarda zańdylyqty qamtamasyz etý jáne sybaılas jemqorlyqtyń aldyn alý boıynsha júıeli negizde jumys júrgizilýde. Olardyń biri — tabıǵı resýrstardy paıdalaný, qorshaǵan ortany qorǵaý jáne ekologııalyq talaptardy saqtaý salasy. Ekologııany jaqsartý azamattarymyzdyń densaýlyǵy men ál-aýqatyn qamtamasyz etýge tikeleı áser etedi. Bul rette jekelegen laýazymdy adamdar para alýdy, bıýdjet qarajatyn jymqyrýdy jáne buzýshylyqtardyń aldyn alý jónindegi ózderiniń tikeleı mindetterin oryndamaýdy qosa alǵanda, sybaılas jemqorlyq quqyq buzýshylyqtar jasaıdy. Máselen, Túrkistan qalalyq soty oblystyq tabıǵat paıdalaný jáne tabıǵı resýrstar basqarmasy janyndaǵy «Jasyl aımaq» KMM burynǵy basshysy I. Begasylovqa, onyń orynbasary A. Ernazarovqa, KMM zańgeri M. Aınabekovaǵa jáne kásipker I. Mýslımovqa qatysty úkim shyǵardy.
— Olar tehnıkalyq erekshelikke jáne qoıylatyn sapa talaptaryna sáıkes kelmeıtin arzan pestıtsıdter men gerbıtsıdterdi satyp alý arqyly 14,9 mln teńge somasynda bıýdjet qarajatyn jymqyrǵany úshin kináli dep tanyldy. Begasylov 2 jyl 6 aıǵa bas bostandyǵynan aıyryldy, Ernazarov, Aınabekova jáne Mýslımov 2 jylǵa bas bostandyǵynan shekteýge sottaldy. Sonymen qatar, olar ómir boıy memlekettik qyzmette jáne kvazımemlekettik sektorda qyzmet atqarý quqyǵynan aıyryldy. Sot aktisi zańdy kúshine engen joq, — delingen habarlamada.
Buǵan deıin Antıkor Kókshetaýdaǵy sý sapasyn jaqsartý jumystaryn baqylaýǵa alǵanyn jazdyq.