Túrkistanda jas kóshetter qýrap ketti: Ákim máseleni qalaı sheshpek

Túrkistanda qýrap ketken aǵash kóshetteri qaıta egiletin boldy. Bul týraly qala ákimi Nurbol Turashbekov málim etti, dep habarlaıdy Kazinform.

Áleýmettik jelide Túrkistan qalasyndaǵy saıabaqtar men alleıalarǵa otyrǵyzylǵan kóshetter qýrap jatqany týraly másele kóterilgen bolatyn. Bul týraly Kazinform da jazdy.

26 qazan kúni Óńirlik kommýnıkatsııalar qyzmetinde ótken brıfıngide Túrkistan qalasynyń ákimi Nurbol Turashbekovten qýraǵan kóshetter jaıyn suradyq.

«Qýrap ketkenderin áleýmettik jeliden kórip otyrmyn. Merzimi ótpese, barlyǵyn merdiger mekemelerge qaıta jasatamyz. Qazir kelisim bar. Bıyl 220 myń túp aǵash egemiz dep josparlap otyrmyz. Sonyń ishinde 56 myń túpti merdiger mekemeler ózderi egedi. Kógaldandyrý isinde jasalyp jatqan jumystar qazir kórinip jatyr. Aldaǵy eki-úsh jylda odan da jaqsyraq bolady. Esik aldyna ekken aǵash ta 100 paıyz ónbeıdi goı. Masshtabty jumystyń arasynda da qýrap ketý – kezdesetin qubylys. Árıne, sony sol merdiger qaıtadan ózi retke keltiretin bolady», – dedi qala ákimi Nurbol Turashbekov.